رواية لم يبقي لنا الا الوداع 2

(7) بداية الشك. بصباح اليوم التالي أسرعت منار إلى الشركة المسؤولة عن المسابقة وطلبت مقابلة مع مديرها وبعد نحو الساعة وافق أخيرًا على رؤيتها فجلست أمامه تشعر بالحرج ويدها تقبض على نسخة من تصميمها وحين سألها عن سبب زيارتها رفعت عينها وحدقت بوجهه قائلة: - أنا كنت جاية أعرف السبب اللي أترفض على أساسه التصميم اللي قدمته للجنة الشركة؟ عقد سامر حاجبيه وتطلع إليها بدهشة وأردف: - أنهي تصميم فيهم لأن المهندس أيمن جاب أربع تصاميم علشان أفاضل بينهم ومأظنش أني قريت اسمك على واحد فيهم. وقفت منار وقدمت له تصميمها وأردفت: - أزاي اسمي مش موجود وأنا مشاركة فالمسابقة ولو حضرتك مش مصدقني دي نسخة عن التصميم اللي قدمته امبارح للجنة، واللي أترفض بدون إبداء أي أسباب ولما سألت محدش جاوبني. التقط سامر النموذج ووضعه أمامه فوق سطح مكتبه وعينه تجول فوق تفاصيله ورفع عينه عنه ونظر إليها وأردف: - أنتِ متأكدة إن النموذج دا أنتِ اللي عملاه وأتقدم للجنة واترفض. أومأت منار بثبات وأكدت بقولها: - حضرتك ممكن تبعت للبشمنهدش أيمن وتجيبه وهو يواجهني ولو طلعت كذابة أنا موافقة تتخذوا ضدي أي إجراء. سارع سامر وهاتف أيمن وطلب مجيئه إلى مكتبه على الفور ووقف أمام منار وحجبها عن النظر وحين ولج أيمن رحب سامر به وأردف: - بشمهندس أيمن أنا كنت عايز أعرف وجهة نظرك فرفض التصاميم؟ أجابه أيمن بثقة: - ما أنا يا أفندم قدمت تقرير عن كل تصميم بنقاط القوة والضعف اللي فيه، هو حضرتك مقرتش التقارير. ابتعد سامر وكشف عن وجود منار فشخص أيمن إليها بذعر والتفت إلى سامر وحدق بوجهه بخوف فرفع سامر حاجبه وأردف: - ممكن أفهم فين تصميم المهندسة منار شُهدي يا بشمنهدس. شحب وجه أيمن ولم يدر بما يجيب سؤاله فهو تخلص من التصميم فوراً قبل وصوله إلى الشركة كما أخبره أمجد ولم يأت على ذكره لأنه أدرك منذ وقع بصره عليه أنه التصميم الفائز، ازدرد أيمن لعابه وخفض بصره قائلًا: - التصميم للأسف وقع عليه القهوة واضطريت أقول إنه أترفض. هز سامر رأسه وردد قوله ساخرًا وأردف: - بقى القهوة وقعت عليه عمومًا الآنسة قدمت لي نسخة بديلة عن اللي وقع عليها القهوة وبصراحة أنا أول ما شوفته قررت أني أعتمده فالمشروع ودلوقتي اتفضل حضرتك وأبعت لي المستشار القانوني علشان نوقع عقد للبشمهندسة علشان تضمن حقها معانا. أومأ أيمن وأسرع بمغادرة الغرفة وهاتف أمجد وأبلغه بما حدث ليهب الأخير عن مكانه وهو يحدق بهاتفه بغضب وصرخ بصوتٍ هادر قائلًا: - وأنت كنت فين لما منار وصلت للشركة وقابلت سامر كنت نايم على ودنك؟ اغتاظ أيمن لتطاول أمجد الغير مبرر وأنهى الاتصال واتجه إلى غرفة المستشار وأبلغه بطلب سامر وعاد إلى مكتبه محاولًا تمالك غضبه، بينما وقفت منار تحدق بوجه سامر لا تصدق أنه يريد التعاقد معها وحين ولج المستشار انتفضت قائلة: - معلش أنا ممكن أعمل اتصال ضروري؟ أومأ سامر مرحبًا وتابعها تحدق بهاتفها وعينيها تلمع بغبطة واستمع إلى صوتها والسعادة تكاد تقفز مع كل حرف تقوله: - حبيبي مش هتصدق أنا تصميمي أتقبل ودلوقتي موجودة فمقر الشركة وعايزيني أوقع على عقد أنهم هيستخدموا التصميم بتاعي. صمتت تنصت لمحدثها بلهفة لتتسع ابتسامتها قائلة: - تمام عايزاك بقى تدعيلي وأنت بتصلي سلام يا حبيبي. التفتت منار وحين لاحظت نظرات سامر إليها احمر وجهها وأردفت: - آسفة بس أصل أنا مقدرتش مبلغش بابا لأنه كان مضايق بسبب اللي حصل معايا امبارح. وقعت منار العقد وهرولت إلى منزلها تقفز فرحًا مع شقيقاتها ليخبرها شقيقها باتصال أمجد بها فالتقطت الهاتف منه وأجابت وعلى وجهها ابتسامة: - اسكت يا أمجد أنا لو أحكي لك قد أنا فرحانة مش هتصدق أصلي النهاردة مضيت عقد مع شركة كبيرة و... بترت منار كلمتها حين أتاها صوته الحاد يقول: - وهترجعي تفسخي العقد يا منار لأن أنا سبق وقلت لك أني مش عايزك تشتغلي وبعدين بدل ما كنتِ روحتي شركة المهندس سامر واشتكيتِ وعملتِ الفيلم دا علشان يقبلوا التصميم اللي أترفض كان الأولى أنك تنزلي معايا نشتري العفش ونرتب لفرحنا ولا أنتِ خلاص نسيتِ أننا مفروض كنا أتجوزنا من كام شهر وحضرتك اللي أجلتي. خبت سعادة منار وتجهم وجهها وبداخلها نمت بذور الشك وروتها الحيرة فكيف لزوجها بمعرفة ما حدث وهو لم يعطها الفرصة لتخبره بالأمس، انتبهت منار لعيون شقيقاتها المتابعة لها فابتسمت بحرج واتجهت صوب غرفتها وأغلقت بابها خلفها وأردفت: - أمجد أنت عرفت أزاي أني روحت شركة البشمهندس سامر وإن أصلًا التصميم أترفض وأنا متكلمتش معاك. لعن أمجد لسانه الذي زلف رُغمًا عنه وحاول أن يشتت انتباهها ولكنها رفضت وأصرت على سؤالها قائلة: - جاوبني يا أمجد عرفت منين إن التصميم أترفض؟ صاح بها غاضبًا: - هو تحقيق يا منار ما خلاص عرفت زي ما عرفت المهم الكلام اللي قلته العقد تفسخيه وتشيلي من دماغك موضوع الشغل نهائي وتبدأي ترتبي لفرحنا وأنا هاجي النهاردة وهتكلم مع عمي واتفق معاه على كل حاجة. أنهى أمجد اتصاله دون أن يترك لها حق الرد، ووقفت منار تحدق بهاتفها بتيه واتجهت بشرود نحو فراشها وجلست تُفكر بتغير أمجد الغريب فغضبه غير المبرر منها لا داعي له أبدًا فكان من الممكن أن يطلب منها ما يريده دون الحاجة إلى رفع صوته، في حين غادر أمجد المؤسسة وعاد إلى منزله فاستقبلته ليان بابتسامة هادئة وأردفت: - رجعت بدري النهارده يعني إيه مافيش صفقات جديدة ولا عقود هتتراجع؟ أشاح أمجد بوجهه عنها واتجه إلى غرفة نومه فتبعته ليان واعترضت طريقه قائلة: - مالك يا أمجد شكلك متعصب زي ما تكون متخانق. ألقى أمجد بجسده فوق فراشه ورماها بنظرة نارية وأردف: - متعصب علشان المفروض لما أرجع من شغلي ألاقي مراتي مستنياني مش ألاقيها مطنشاني وتكلمني كأني بشحت منها، فلو مضايق أوي أني متعصب فحقك عليا ولو وجودي مضايقك أنا ممكن امشي عادي المهم راحتك ما هو البيت بيتك وأنا ماليش الحق أتكلم أو أعترض. عاد أمجد وهب عن فراشه فمنعته ليان من مغادرة الغرفة وهي تتوسل قائلة: - أمجد أرجوك أنا مش قصدي أي حاجة واللي حصل مني أمبارح بابا عاتبني فيه ولو كنت بسألك فأنا استغربت لأني ليا فترة بطلب منك ترجع بدري وكنت تقولي عقود وصفقات. زفر أمجد وأشاح بوجهه عنها وأردف: - أنتِ بتزودي الغلط بغلط يا ليان وبدل ما تعتذري بتقولي إنك متراجعتيش إلا لما عمي كلمك يعني محستيش أنك غلطانة من نفسك عمومًا أنا عند كلامي لو مش عايزاني أنا ممكن أمشـ... التفت حوله ووضعت يدها فوق شفتيه لتمنعه من قولها وانهمرت دموعها قائلة: - أنا آسفة يا أمجد بس أوعى تسيبني أنت عارف أنا بحبك قد إيه ومقدرش استغنى عنك. جذبها نحوه وكفكف دموعها وأردف: - يا ليان أنا كمان بحبك ويمكن أكتر منك بس سبق وقلت لك لو زعلانة مني فأي حاجة تعالي اتكلمتي معايا واشتكي لي مني وبلاش تستكتِ، يا حبيبتي أنا ملاحظ من فترة أنك ساكتة وكل ما أبص لك تخبي عينك عني حاولت أجرك فالكلام بس أنتِ رافضة، وبصراحة بعد اللي عملتيه معايا امبارح وأسلوبك دلوقتي فالكلام جرحني وحسيت أنك بتقللي مني ومش عايزني، عمومًا حقك عليا ويا ستي لو في حاجة صدرت مني ومزعلاكِ قوليلي وأنا أصالحك واعتذر لك كمان ولو حابة أخدك وأطلع قصاد عمي أبوس راسك فأنا مستعد. زادتها كلماته ندمًا فتشبثت به وأردفت: - لا يا أمجد أنا اللي غلطت ومفروض اعتذر لك مش أزود زعلك مني. ربت أمجد ظهرها وحملها ومددها فوق فراشه وتسطح بجوارها وجذبها واضعًا رأسها فوق صدره وأردف: - أنا عارف إن موضوع الحمل اللي أتأخر مأثر عليكِ ومضايقك علشان كده أنا قررت أخد أجازة وأسافر معاكِ تكشفي فالمكان اللي تشاوري عليه وتشوفي علاج غير اللي جربتيه هنا، المهم أنك تهدي وتبطلي تقفلي على نفسك وتحرميني منك. داعبت وجهه بإصبعها وأردفت: - مافيش داعي نسافر أنا خلاص اقتنعت إن كل حاجة مكتوبة وربنا لو رايد لي أكون أم أكيد هبقى أم من غير ما أسافر. سألها أمجد بحيرة عن سبب اقتناعها فأجابته بحرج: - بصراحة أنا كنت مقصرة مع ربنا بس الحمد لله رجعت انتظمت فالصلاة والتزمت بالأذكار ومن امبارح وأنا حاسة بالراحة. مد أمجد يده ورفع وجهها نحوه وأردف: - يعني مش هتتعصبي كل شهر وترمي الاختبارات وتخاصميني كأني السبب. هزت رأسها بالنفي فابتسم قائلًا: - حيث كده يبقى تصالحيني على اللي حصل منك وتعتذري لي كمان. احمر وجهها حرجًا وأردفت: - وبعدين يا أمجد عايزني أصلحك الضهر طب ما تخليها بالليل ونسهر سوا سهرة حلوة من بتوع زمان. اسكتها أمجد بوضعه إصبعه فوق شفتيها وقوله: - أنتِ تصالحيني دلوقتي وأنا أسهرك بالليل بعد ما أرجع من مشواري اتفقنا. أومأت وهي تجذب رأسه نحوهها وهي تهمس له بمشاعرها نحوه. (8) انكسار. عزمت على تنفيذ قرارها لابد أن ستصل لإجابة سؤالها رُغم أنف الجميع، واتجهت صوب مكتب أيمن وولجته دون إذن وجلست أمامه فنظر إليها بضيق وأشاح ببصره عنها قائلًا: - هو مش في باب يا آنسة تخبطي عليه الأول قبل ما تدخلي ولا البشمهندسة متعرفش حاجة عن الذوق؟ ابتسمت ببرود ووضعت ساقًا فوق الأخرى وأجابته باستفزاز: - عادي يا بشمهندس ما أنا وأنت تقريبًا فحكم زمايل العمل وما أظنش أْن زميلك كل ما يدخلوا المكتب يخبطوا، عمومًا ليك عليا المرة الجاية أخبط، المهم قولي القهوة اللي وقعت على التصميم كانت بوش ولا من غير وش. اعتدل أيمن بمقعده ورمقها بضيق وزفر بقوة لمحاولتها استفزازه الواضحة وأردف: - كانت بوش وسادة يا بشمهندسة. ضحكت منار هازئة وصفعته بقولها: - ليها حق تقع أصل مينفعش تبقى بِوش وأنت موجود؟ هب أيمن عن مكانه وصاح بغضب: - جرى إيه يا بشمهندسة أنتِ جاية مكتبي تشتميني ولا إيه؟ وقفت منار أمامه ووضعت كفيها فوق سطح مكتبه وأردفت بجدية: - لا أنا جاية أعرف منك اسم اللي زقك عليا علشان ترفض التصميم؟ ولعلمك أنا مش همشي من هنا إلا لما تقولي وصدقني أنت لو متكلمتش أنا هطلع على مكتب البشمهندس سامر وساعتها هتلاقيه بيطلبك وهيعرف منك بطريقته. ازداد تجهم وجهه إزاء إصرارها الغريب لِمعرفة اسمه وتهديدها له، وبادلها النظرات لِبضع ثوان تأكد خلالها إنها لن تتراجع عن معرفة إجابة سؤالها مهما أراد فزفر بحنق وأردف: - لو مصممة تعرفي يبقى توعديني إن الكلام اللي هَقوله هَيفضل سر بينا وأنك مهما حصل مش هتجيبي سيرة للمهندس سامر ولا هتدخليه ما بينا. أومأت منار ووعدته ولاحقت وجهه بعيون وجلة وأحست بقلبها يرجف خوفًا، وَحين اخبرها هويته تراخت ساقاها فدعمت جسدها بتمسكها بحافتي مكتبه وتمالكت نفسها فلا مجال لها لِتنهار أمامه أو تتخاذل فامعنت نظرت إليه واقرت بألم: - وأنا عندي وعدني ليك إن محدش هيعرف منى أي حاجة، بس وأرجوك بلاش تحاول تبلغه وتقوله أني عرفت علشان ساعتها أنا مش هسكت إلا لما تترفد من هنا اتفقنا. غادرت منار مكتبه بقلب منفطر وعادت إلى مكتبها المؤقت الذي فاجئها سامر به وجلست بتيه تشعر بتوقف عقلها، حاولت منار عدم التفكير في الأمر ولكنها لم تفلح فقررت المغادرة وأثناء سيرها لمحها سامر فترك ما بيده ونادها ولكنها لم تنتبه لصوته إلا حين اعترض طريقها وحين تقابلت أعينهم أجفل من نظرات الحزن الواضحة بعينيها وأردف: - مالك يا منار هو في حد هنا ضايقك ولا حاجة؟ هزت منار رأسها بالنفي وهتفت بصوت محشرج: - ما فيش أنا بس مصدعة شوية فقلت أمشي. أشار إليها سامر بمرافقته ولم تدر منار لِما استجابت لِدعوته وتبعت خطواته؟ وجلست بجواره بسيارته واسندت رأسها إلى النافذة بجوارها وتاهت مرة أخرى بدائرة أفطارها، بعد قليل صف سامر سيارته أمام أحد المقاهي فانتبهت وتطلعت حولها بحيرة وعادت بعينها إليه وسألته: - أنا إيه اللي جابني هنا؟ منعها سامر من المغادرة وأصر على دعوتها لِتحتسي برفقته القهوة فَأطاعته بضيق وجلست أمامه بوجه متجهم فأشار إلى عبوسها وأردف: - على فكرة أنتِ لو فضلتِ مكشرة كتير هَتعجزي بدري، دا غير إن الناس اللي قاعدين حوالينا ممكن يطلبوا لي الشرطة ويقولوا أني خطفك. رسمت منار ابتسامة واهية فوق شفتيها فسارع سامر قائلًا: - بصي هو أنا آسف بس بلاش تبتسمي وخليكِ مكشرة أحسن علشان التكشيرة طلعت أرحم. حينها ابتسمت منار بحرج وأردفت: - مش أوي كده يا بشمهندس عمومًا أنا بشكرك على الدعوة وبعتذر علشان فمود مش متظبط، وأرجو إن حضرتك متخدش عني فكرة غلط يعني أكمني وافقت أجي معاك أصل أنا أول مرة أخرج مع حد غريب، وبصراحة بابا لو شافني ولا أمجد مش هيعدوا الموقف على خير أبدًا. بهتت ملامحه لكلماتها الصادمة فهو لم يأت إلى عقله أبدًا أن يفكر بها بتلك الصورة، فهو منذ رآها تجلس أمامه بمكتبه وأحس أنها سلبته جزء من عقله وقلبه لصالحها، ولم يأت على خاطره قط أن يفكر بها بتلك الطريقة أبدًا، ليس لإعجابه بها ولكن لأنه شخص تعود طوال حياته ألا يرمي أحدًا بظنون باطلة، وزاده سوءًا ذكرها اسم أمجد بحديثها فأردف بغيرة طفيفة: - على فكرة أنا عمري فحياتي ما حكمت على أي شخص من مقابلة ولا تصرف عمومًا لما تتعاملي معايا هتعرفيني بشكل أوضح، أما بالنسبة لوالدك فأنا مستعد أكلمه وأوضح له سبب مقابلتنا علشان أرفع عنك الحرج. حمحمت منار بحرج فهي للحظة لا تعلم كيف تفوهت بتلك الكلمات فاعتذرت قائلة: - أنا بعتذر لحضرتك واضح إن حالتي المزاجية مأثرة عليا ومخلياني أقول كلام بايخ ياريت حضرتك متزعلش مني. لم يشأ سامر أن يضيف عبأ أخر عليها فملامحها تخبره بأنها تمر بظروف سيئة فابتسم لها محاولًا التغاضي لتهون الأمر على نفسها وأردف: - ولا يهمك المهم إني كنت حابب تصميمي لنا نموذج جديد لملامحق سكنية تكون بسيطة وتكلفة الإنشاء فالمعقول. أومأت وعلى ثغرها ابتسامة وأردفت: - إن شاء الله بس حضرتك هتحتاجه على أمته علشان أشوف وقتي والدراسة وكده. أخبرها سامر بالتأني وترك لها مهلة مفتوحة دون قيود وأردف: - أنا أسف لسؤالي بس واضح إنك مرتبطة بوالدك بدرجة كبيرة على كده عندك أخوات غير أمجد. احمر وجهها وأجابته بارتباك: - لا أمجد مش أخويا دي خطيبي ومكتوب كتابنا وهنتجوز بعد ما أخلص الكلية، إنما أخويا فاسمه أحمد وعندي أربع أخوات بنات. تلاشت ابتسامته وحاول أن يخفي خيبة أمله فهو لم يتوقع أن تكون مرتبطة فعقب بقوله: - آه أنا بعتذر أصلي افتكرتك مش مرتبطة علشان مشفتش الدبلة فأيدك فقلت إن أمجد يبقى أخوكِ، عمومًا مبروك يا بشمهندسة. رفعت منار يدها أمام وجهها وحدقت بإصبعها المُلتهب وأردفت: - الله يبارك فحضرتك ولو على الدبلة فهي للأسف عملت لي حساسية واضطريت أقلعها علشان العلاج. أومأ سامر وأشاح بوجهه عنها لِيخفي حزنه فهو سمح لنفسه أن يحلم بها والآن بات حُلمه محرمًا فهي لآخر وعليه احترامه، زفر ليتمالك أمره والتفت إليها وأردف: - وأمجد على كده زميلك فِالكلية ولا فِكلية تانية؟ هزت منار رأسها بالنفي وأجابته بعبوس: - لا أمجد متخرج من هندسة القاهرة من زمان وِبيشتغل في مؤسسة علم الدين. عقد سامر حاجبيه وهو يفكر بصاحب الاسم وهز رأسه بالنفي، فَأمجد الذي يعرفه متزوج من ليان علام، ولا يمكن أن يكون هو الشخص نفسه الذي تتحدث عنه فكاد يسألها ولكنه تراجع كي لا يساء فهمه، اختلست منار النظر نحوه وأحست ردة فعله أنه يخفي أمرًا ما عنها، فجأة ارتجفت وأحست بنغزة باردة تصفع قلبها ولم تدر لِما أدارت وجهها وحدقت بعينه ورسمت على شفتيها ابتسامة بلهاء وهي تخبره: - تعرف يا بشمهندس أنا كان ممكن من أول يوم ليا فالكلية أقول إني مرات أمجد المُشير علشان أسهل أموري زي باقي زمايلي ما عملوا لكن أنا محبتش أعمل كده وقلت إني لازم أثبت لنفسي وللكل أني مش محتاجة واسطة، بس الحاجة الغريبة إن من أول سنة وأنا بقابل اضطهاد غريب زي ما يكون كان في حد بيحاول أنه يوقف خطواتي ومش عايزني أثبت وجودي فالكلية وللأسف اتعرضت لظلم كتير وفكل مرة كنت بحبط فيها كنت بفكر استغل صلتي بأمجد لكن كنت برجع تاني وأقول أكيد ربنا مش هيضيع تعبي وفعلًا ربنا عوضني لما قلت أني مش هتكلم عن صلتي بأمجد لكن هدافع عن حقي فجيت وقابلت حضرتك والحمد لله ربنا كافئني والحقيقة ظهرت والتصميم اللي شاركت بيه فالمسابقة فاز. لم ينتبه سامر لحديثها فقد تبلد عقله أمام ذكرها اسمه زوجها كاملًا وأخذ يحدق بملامحها لا يصدق أن تكون منار زوجة ثانية لأمجد، لاحظت منار صدمته وكادت تسأله ولكنها تراجعت وأحست أنها أكتفت من المفاجأت وقررت الانصراف ونظرت إلى ساعة يدها ووقفت بحرج وأردفت: - أنا آسفة يا بشمهندس بس الوقت عدى وأنا مش حابة أتأخر فأسمح لي أمشي. أومأ بتفهم وسار بجوارها بقلب منكسر إلى الخارج وأشار لسيارته لمرافقتها إلى منزلها ولكنها رفضت بإصرار وغادرته بوجوم وجلست داخل إحدى السيارات تفكر بأمر تعبيرات وجهه الغريبة وردة فعله حين أتت على ذكر أمجد، وازداد وجومها وزفرت قائلة: - أنا لازم أفهم في إيه بالظبط بيدور من حواليا وِعرفاه؟ طلبت منار من السائق تغيير وجهته إلى أخرى بديلة، وبداخلها تعاظم توترها فَتلك زيارتها الأولى لمقر عمل أمجد الذي حذرها مرارًا من الاقتراب منه تحت أي ظرف، والآن هي لا تعلم كيف ستكون ردة فعله حين يراها أمامه ولكن مهما كانت استجابته عليها مواجهته ووضع حد لشكوكها؟ صف السائق سيارته أمام بوابة المؤسسة الخارجية فَغادرتها منار باضطراب ووقفت للحظات يحثها عقلها على التراجع ولكنها التقطت أنفاسها بقوة وخطت إلى الداخل فَأوقفها أحد رجال الأمن فابتسمت بحرج وأردفت: - بعد أذنك كنت عايزة أقابل البشمهندس أمجد المُشير. تفرس بها الحارس بجدية وسألها باحترام وعلى شفتيه ابتسامة ترحيب: - لو مافيش أي مواعيد سابقة يبقى حضرتك ممكن تدخلي للسكرتيرة بأول دور وهي هتقولك على التفاصيل. أومأت منار بابتسامة مماثلة لخاصته وتبعت ارشاداته حتى توقفت أمام مكتب السكرتيرة وقرأت اسمها المدون باللوحة فوق سطح مكتبها وطلبت منها رؤيته فَبادلتها سميرة الابتسامة باحترام وأردفت: - البشمهندس النهاردة عنده اجتماع وللأسف الجدول مزحوم جدًا ومش هيقدر يقابل أي حد بدون ميعاد سابق، فلو ممكن تسيبي بياناتك وأول ما المهندس جدوله يسمح بالمقابلة هنتصل ونبلغك بالميعاد. بهتت ملامح منار وتساءلت عن أي اجتماع وجدول تتحدث وقد أخبرها أنه يعمل بمكتب يضم ضمن مئات المهندسين فنظرت إلى وجه سميرة وعقبت بحرج: - أنا آسفة بس الظاهر إن حضرتك فهمتيني غلط أنا أقصد المهندس أمجد المُشير هو بيشتغل هنا في المكتب الهندسي بس الظاهر اختطلـ... قاطعتها سميرة بعبوس طفيف قائلة: - حضرتك المؤسسة مفيهاش إلا المهندس أمجد المُشير مدير المؤسسة ونسيب دكتور علام. نزل القول على سمع منار وكأن سميرة أخبرتها نكتة هزلية فكادت تنفجر ضاحكة ولكن أمام جدية ملامح سميرة ازدردت لعابها وسألتها بصوت متلعثم وهي تدعو الله أن يخيب ظنونها: - هـ ـو البـ ـشـ ـمهـ ـندس متـ ـجوز بنت الدكتور علام؟ أكدت سميرة قولها بهزة طفيفة من رأسها وهي تشيح بوجهها عنها وتلتقط سماعة الهاتف تقول: - عم شعبان أعمل فنجان قهوة مظبوط للبشمهندس ووديه اوضة الاجتماعات قبل ما يبدأ اجتماعه. ثم التقطت سماعة هاتف آخر بجوارها وضغطت بضع أزرار وأردفت: - أيوة يا بشمهندس الفريق على وصول وأنا بلغتهم إن حضرتك مش هتناقش معاهم أي بنود سبق وراجعتها معاهم زي ما أمرت وطلبت لك القهوة. استمعت منار لصوت سميرة وكأنه يأتي من بعيد وغادرت المكتب بخطى ثقيلة تشعر وكأن أحدهم أنهال على رأسها وضربها بقوة فهي لم تعد تعرف من هي ولا ماذا تفعل هنا؟ وأثناء سيرها الشارد كادت تصطدم بساعي المكتب فاعتذرت منه بتيه واستكملت خطواتها ولكنها وقفت والتفتت نحوه فَرأته يقف أمام إحدى الغرف وَيلجها، وَكإنسان آلي حسمت منار قرارها وخطت باتجاه الغرفة نفسها وَولجتها وتقدمت بضع خطوات لمنتصفها وتجمدت خطاها حين لمحت رأسه يختفي بين الكثير من الأوراق وسمعته يأمر الساعي بِترك القهوة والانصراف، بعد نحو الدقيقة رفع أمجد رأسه فَوقع بصره عليها فَشخص بها لا يصدق أنها خالفت أمره وجاءت، فَهب على قدميه مُزدردًا لعابه وطالع ملامحها اليابسة بصدمة وقبل أن ينبث أيًا منهم بكلمة اقتحمت ليان الغرفة وهي تناديه بصوتٍ مفعم بالسعادة ورأتها منار تتجاوزها وتحتضنه وتمطره بقبلاتها فكادت تمنعها من لمسه بصرخة مدوية احتبست بحلقها حين أجهزت ليان عليها بقولها: - مش هتصدق يا أمجد أنا لسه جاية من عند الدكتورة واول ما بشرتني بِالخبر جيت لك جري علشان نفرح سوا، حبيبي أخيرًا حلمنا اتحقق وهيبقى عندنا بيبي. ودت منار لو تنشق الأرض وتبتلعها لتُرحم من مذلة الانكسار فنصب عينها زوجها وامرأة أخرى تقبله وتزف إليه نبأ حملها، ابتسمت بحزن لتتفاجأ بتحول ابتسامتها إلى ضحكة تعالت شيئًا فَشيء حتى دمعت عينيها وبات الأمر يهدد بحدوث كارثة، التفتت ليان إلى الخلف حين جذب صوت ضحكتها انتباهها فحدقت بملامحها الغريبة وفحصتها بعينها بريبة وابتعدت عن أمجد الذي ازداد جموده ورجيف قلبه لرؤيته منار على وشك الأنهيار أمامه، لتنتشله من اضطرابه بِسؤالها الحائر المملوء بالغيرة وهي تتفحصه بملامح مقطبة: - مين دي يا أمجد؟ وقع سؤال ليان على سمع منار كالصفعة التي محت أثر ضحكتها من وجهها وتطلعت نحوه هي الآخرى بترقب تنتظر إجابته على أحر من الجمر، وتمنت بداخلها لو كان يملك قدرًا يسيرًا من الشجاعة ما يخوله لِيجيب سؤالها ولكن أكد ظنها بصمته فرمقته باحتقار وشمخت برأسها واقتربت منها ومدت يدها إليها وصافحتها قائلة: - المهندسة منار شُهدي كنت فمقابلة مع البشمهندس بس للأسف عرض الشغل اللي قدمه مش مناسب وكنت لسه هبلغه برفضي وقت ما دخلتِ، وبعتذر على ضحكي أصل كان معايا مكالمة ومقدرتش أمنع نفسي من الضحك، عمومًا بكرر اعتذاري ولو تسمحي لي أقولك مبارك على البيبي عن إذنك. غادرتهم بثبات وما أن أغلقت باب الغرفة خلفها حتى أطلقت لساقيها الريح وأخذت تعدو وكأنها تهرب من حيوانٍ ضاري يريد الفتك بها، ولم تدر كم مضى عليها وهي تهرول فالطريق ولكنها انهارت فجأة وتوقفت حين نضبت قدرتها على التنفس وتلاشت قوتها وكادت تسقط أرضًا ولكنها تشبثت بالحاجز الفاصل بينها وبين النيل، فمالت بجذعها تحدق بصفحة الماء بعيون غائمة وأنفاس متلاحقة تتساءل لِما؟ بعد مرور بضعة ساعات خطت إلى داخل مسكنها يملائها الخواء ووقفت تحدق بعين والدها الذي هب عن مقعده، يشعر أن قلبه يوشك على التوقف وفحصها بنظراته بحثًا عن أي أثر لإعتداء او إصابة، فهي غائبة عن المنزل منذ ساعات وهاتفها مغلق، وكاد يسألها عن السبب إلا أنها أشاحت بعينيها بعيدًا هربًا منه لإحساسها بالخزي منه فيكف تواجهه وهي السبب وكامل المسؤولية يقع على كاهلها، تجمدت لوهله حين اصطدمت عينيها بعينه فهزت رأسها يمينًا ويسارًا رفضًا لوجوده ورمقته بنفور وابتعدت واضعة بينهما مسافة فاصلة، فازداد غضبه لإحتقارها إياه وثار كبريائه فرفع حاجبه بتحد لِيخبرها بثقة مفرطة وعنجهية أنها لن تستطيع منعه عنها ولا التفوه بكلمة أمام والدها وزم شفتيه وخطى صوبها ولم يدرك أمجد خطأ اقترابه منها إلا حين رفعت منار يدها وصدته عنها وحين أصر على اقترابه صرخت بقلب ملتاع وهرولت تحتمي بين ذراعي والدها بجسدٍ منتفض تتوسل إبعاده عنها، تجمد أمجد وزاغت نظراته التي اكسبها صدمة مزيفة من فعلتها، فَرمقه شُهدي بنظراتٍ حادة وريبة وهو يشدد من احتضانه لها وسأله بصرامة: - أنت عملت فِبنتي إيه علشان توصل للحالة دي وترتعش بالمنظر دا؟ ازدرد أمجد لعابه ونفى فعله لشيء حينها رفعت منار وجهها ونظرت لوالدها بقلبٍ منفطر وأردفت بانكسار: -لا عملت وعملت اللي لا يمكن كنت أتخيل أنك تعمله أنت خاين وغشاش ومعندكش ضمير وأنا من اللحظة دي مش عايزة أعرفك تاني. صرخ بوجهها وقد استبد به غضبه: - جرى إيه يا منار ما تحافظي على لسانك وتفوقي وتشوفي أنتِ بتتكلمي معايا أزاي؟ ابتعد منار عن دائرة أمانها ورمقته بكراهية وبادلته الصراخ قائلة: - أنا أكلمك بالطريقة اللي تعجبني وبأي أسلوب أشوفه مناسب لواحد سقط من نظري ومعدش له أي وجود فِحياتي، وأظن بعد التمثيلية اللي كنت بتخدعني بيها ما اتكشفت وخلصت وكلمة النهاية نزلت النهاردة، بلاش تبص لي وكأنك مصدوم ومش فاهم أنا بتكلم عن إيه؟ عقد شُهدي حاجبيه وسألها بحدة: - إيه يا منار الأسلوب اللي بتتكلمي بيه دا يا بنتي وبعدين ما تفهميني تمثيلية إيه ونهاية إيه اللي بتتكلمي عنها؟ ما توضحي في إيه ولا أنتِ ناوية تسيبيني على عمايا؟ التفتت نحو والدها وأطرقت برأسها أمامه بأسف وأردفت: - أنا هقولك على كل حاجة يا بابا لإنه حقك وواجب عليا أحكي لك بس الأول أنا ليا عندك طلب واحد أرجوك توافقني عليه، أنا عايزة حضرتك تديني فرصة واحدة واعتبرها المرة الأخيرة اللي هتسمح لي فيها أتكلم مع أمجد من الأساس، وبعدها هفهمك اللي حصل واللي عرفته وهسيب لك أنت وبس حق اتخاذ القرار بدون أي تدخل مني؟ بادل شُهدي نظراته بين ملامح ابنته المحتقنة ووجه أمجد المضطرب وللمرة الأولى يرى نظرة الانكسار تلك بعينيها فأدرك أن هناك أمرٌ ما خطير وقع بينهما فهو لم يرها بتلك الحالة إلا مرات قلائل فنغزه قلبه وكاد يرفض طلبها ولكنه استجاب وانصرف رُغمًا عنه لِعلمه أنها زوجة أمجد حتى اللحظة وأنه لا يستطيع منعها عنه ولا التدخل بينهما إلا إذا أرادت هي. (9) مواجهة صادمة. تنفست منار بقوة وشبكت كفيها معًا والتفتت إليه، ونظرت نحوه وفحصته بِعينيها فأحست أنها تراه للمرة الأولى دون قناعه الذي اعتاد إخفاء حقيقته خلفه وابتسمت ساخرة لِسذاجهتها، فهي سلمت له أمرها بالكامل منذ سنوات، وعاشت تُفكر بعقله مرات ومرات لِتدرك الآن أنه لم يسع إلا لِمصلحته وشخصه، لذا عليها أن تضع حدًا لِكل عبثه! التقطت منار نفسًا عميقًا وزفرته قائلة: - طلعت ممثل شاطر يا أمجد، وقدرت تخدع كل اللي حواليك بوش الشاب المكافح الطموح اللي بيسعى علشان يحقق ذاته ويبني نفسه بمجهوده، بصراحة أنا برفع القبعة علشان قدرت تحافظ على سرك ومحدش قدر يكشف خداعك، وعارف أنا لو كان حد جه قال أنك كذاب وخاين وأقسم أنك متجوز واحدة تانية مكنتش هصدق، بس حظك يا أمجد إن أنا اللي شوفتك بِعيني زي ما يكون ربنا أراد إن يفوقني من غفلتي وتنكشف حقيقتك قصادي. أثارت غضبه ببرود حديثها فاقترب منها وقبض على ساعدها مُردفًا: - منار الزمي أدبك معايا ومتنسيش إني جوزك يا هانم، وبعدين أنا عايز أعرف أنتِ إيه اللي جابك المؤسسة من غير ما تستأذنيني؟ وِأزاي أصلًا يا محترمة تسمحي لنفسك تخرجي مع راجل غريب؟ لعلمك أنا هحاسبك على كل غلطاتك دي بس هأجل الحساب لحد ما تبقي فبيتـ... خلصت منار ساعدها منه ودفعته عنها بقوة لم تعرف كيف امتلكتها ووقفت تتطلع نحوه بصدمة لا تصدق تبجحه وجرأته فأشارت إليه بإصبعها قائلة: - بيت مين يا أمجد اللي بتتكلم عنه، فوق البيت دا خلاص معدش له وجود وعمر ما هيكون فيه بيت يجمعني بيك، ولا هيبقى في حساب من الأساس بينا بعد النهارده، علشان أنا معدتش عايزة أشوفك بعد اللي عرفته عنك ولا حتى عايزة يكون لي أي صلة بيك، وبالنسبة لموضوع أنك جوزي والكلام الفاضي دا فأنت هَتطلقني ودا آخر كلام ليك عندي. أطاحت بتعقله بطلبها الطلاق منه وكاد يصفعها لتجروأها على طلب الطلاق منه ولكنه تراجع، فهو لا يريد هدم كل سبله إليها كي لا يخسر وعليه تمالك نفسه خاصة أنه بمنزلها فعاد إلى الاقتراب منها وهو يختلس النظر حوله وأردف: - لو في حد فينا محتاج يفوق فهو أنتِ يا منار علشان أنا مش هطلقك مهما عملتي، ولعلمك أنتِ لو نشفتي دماغك أنا ساعتها هضطر أطلبك في بيت الطاعة علشان مش مستعد أخسرك. لم تصدق إصراره المقيت للنفس بتمسكه بها وهو زوج لأخرى وارتمت فوق الأريكة بانهزام ونظرت نحوه بحسرة، فَقلبها أحبه وعاش يحلم طويلًا باللحظة التي ستكون له ولكنه غدر بها وطعنها بخيانته لها وأمام نظراته المتحدية لها أجابته بتأكيد: - حتى لو طلبتني فبيت الطاعة عمري ما هكون ليك ولا هشوفك راجل يملى عيني بعد ما بعتني بالرخيص، وصدقني أنت لو عاندت فأنا كمان هعاند وهرفع عليك ق\ضية خلع ومش كده وبس، لا أنا هروح لمراتك بنت الحسب والنسب اللي أكيد ضحكت عليها زي ما ضحكت عليا وهَكشفك على حقيقتك وهَفضحك قصادها، وهقولها إن أمجد المُشير الفارس المغوار مش أكتر من محتال لعب بيها وخدعها زي ما لعبت بقلبي وبحياتي وكسرتني بدل المرة تلاتة، مرة لما هربت مني وأنا فِأشد احتياجي لِوجوده معايا، ومرة لما اتجوزت واحدة تانية وأنت معيشني في الوهم، ومرة لما روحت اتفقت مع المهندس أيمن وطلبت منه يرفض تصميمي علشان أمجد المُشير بجلالة قدره مينفعش واحدة زي منار البنت الفقيرة اللي أبوها شغال بدل الشغلانة اتنين علشان يوفر لهم لقمة العيش واللي له سنين مديون تنافسه وتبقى أحسن منه، مش دا السبب اللي علشانه روحت استخدمت أقذر الأساليب وكنت عايز تقتل طموحي وتسرق فرحتي فكل مرة أثبت نجاح فيها، للأسف يا أمجد أنا اكتشفت متأخر جدًا أنك إنسان أناني ومغرور ومش بتحب إلا نفسك وصدقني مراتك صاحبة الأملاك لو عرفت كل دا عنك ما أظنش أنها هتفضل باقية عليك وأكيد هَترميك برا حياتها زي ما أنا هرميك؟ ود لو يخرس لسانها عن الكلام فهي تكشف عورة عيوبه رُغم ضعفها، فزفر وأمعن النظر إليها فأخبرته عيناها أنها لن تهدأ حتى تنفذ وعدها، ولكن أكثر ما هاله كان انطفاء جذوة الحب خاصته التي كانت تلمع بعمق عينيها فأشاح بوجهه عنها وأردف باستسلام: - تمام يا منار أنا هعمل لك اللي أنتِ عايزاه عن إذنك. هم أمجد بالانصراف ولكنه توقف حين ارتفع صوت شُهدي الذي استمع إلى حديثهم بقوله: - استنى عندك وقبل ما تروح لحال سبيلك أرمي على بنتي يمين الطلاق علشان منار مش هتبات ليلة زيادة وهي على ذمتك، ولو على للمأذون فأنا كلمته وزمانه على وصول، واطمن بنتي هَتبريك وهَتتنازل عن أي حق ليها عندك، حتى شبكتك هسلمهالك هي وكل حاجة جبتها، الله الغني عن أي حاجة تيجي من طرفك، ولو على حق بنتي برقبتك فربنا قادر وعادل وبكرة يجبر خاطرها ويطيب كسرها وينسيها حتى اسمك. جلست أمامه تحدق بعينه بثبات وقوة ولم يرف لها جفن تعلم أنه سيمضي بعيدًا عنها ويرحل ولكنه سيخلف بقلبها جُرحًا غائرًا تعلم أنه لن يندمل أبدًا، وبلحظة مر شريط حياتها برفقته أمامها وأحست بيد باردة تنزع وجوده من داخل كل ذكرى جمعتهما معًا ذات يوم، فجأة ساد المكان هدوءًا مريبًا فرفعت عينيها فأبصرت الشيخ يغلق دفتره ويغادر مُستغفرًا بينما تجمد أمجد بمكانه بوجوم، وقبل أن تشيح وجهها بعيدًا تلاقت أعينهما وبثوان وجدته يجثو أمامها ويتطلع بملامحها بحزن ولم تدر كيف السبيل لتمنع دموعها من الانهمار أمامه فتلك هي نهاية قصتهما ولحظة وداعهم الأخيرة، ومن مكانه تابعهم شُهدي فتسلل بعدما أدرك أن لا خوف على ابنته من الآن فصاعدا، ظل الصمت يغلفهم لدقائق قطعها أمجد بقوله: - أنا لو لفيت الدنيا مستحيل هلاقي قلب زي قلبك للأسف بغبائي خسرتك ومعرفتش أحافظ عليكِ، منار أنا عمري ما كذبت عليكِ لما قلت لك إني بحبك وهَفضل أحبك لآخر نفس جوايا، أنا عارف إنك مش مصدقاني وفاكره أني بمثل عليكِ بس صدقيني الراجل اللي قاعد تحت رجلك هو أمجد حبيبك اللي مكنش يتخيل إن هيجي عليه اليوم وتضيعي منه. تحشرج صوت أمجد وهو يخبرها كم أحبها فكتمت منار أنفاسها لرؤيتها دموعه تسيل فوق وجنتيه وودت الهرب ولكنه التقط يدها قائلًا: - أنا ضعفت وشيطاني عماني وخلاني مش شايف إلا نفسي وافتكرت إن طالما بتحبيني أبقى ضمنتك، ومش هنكر أني فعلًا حسيت بالغيرة منك بس فنفس الوقت كنت خايف عليكِ، خوفت أحسن يكون في حد شبهي ويضايقك، علشان كده اتصرفت وبدأت أضيع منك أي فرصة تجيلك. ترك أمجد يدها ووقف أمامها واستطرد قائلًا: - أنا همشي زي ما أنتِ عايزة وهختفي، بس مش خوف منك ومن تهديدك أنك تفضحيني، لا أنا همشي لأني مش قادر أشوف نفسي صغير في عينك أكتر من كده. غادر فأسرع والدها وضمها بقوة لتنهار منار بين ذراعيه تنتحب حبها المسلوب وجرحها الغائر، فمد شُهدي يده ورفع وجهها نحوه وأردف: - عارف أني مينفعش أتكلم وأنتِ بالحالة دي، لكن حقك عليا يجبرني أقولك إن اللي اتبنى بينكم على الغلط كان لازم يتهد، وأحمدي ربنا إن قصتك أنتِ وأمجد انتهت قبل ما خسارتكم تكون أكبر. تعلم أنه على حق فهي خانت ثقته ولكنها رُغم ذلك تشعر بألم فاق تحملها، فأغمضت عينها وأسندت رأسها فوق صدر والدها، فَربت شُهدي ظهرها برفق مُضيفًا: - كل شيء فأوله صعب ومن رحمة ربنا أنه أنعم علينا بالنسيان، وواحدة واحدة الأيام هَتداوي جرحك وهتلاقي وجعك قل صحيح بس هَيسيب أثر، فأتمنى أن الأثر دا يخليكِ تاخدي بالك بعد كده علشان متقعيش بِنفس الغلط وتعيدي نفس المأساة والمعاناة. لم يستطع أمجد العودة إلى منزله وقاد سيارته حتى صفها بأبعد نقطة فوق قمة المقطم وأسند رأسه بانهزام فوق مقود سيارته يُفكر بخسارته الفادحة لمنار والتي لن تعوض أي فتاة أخرى حتى ليان، فهو شكلها طويلًا على يده وزرع خصاله بداخلها وأطلعها على طباعه حتى بدت في نهاية الأمر بالصورة التي تمناها دائمًا، والآن ضاعت من يده ولا فرصة أمامه لِيستعيدها مُجددًا فمن المؤكد أن والدها سيحيطها بدرع حمايته لِيمنعه عنها، زفر أمجد ورفع رأسه وتطلع حوله وتذكر نظرتها حين علمت بحمل زوجته، كم ود بتلك اللحظة أن ينفصل بها عن العالم ويضع كفيه على كتفيها ويهزها بقوة لتمردها على أمره واقتحامها مكتبه دون إذن، ولكنه خشى أن تسأله ليان وتصر على معرفة صفتها بحياته حينها كان سيخسر على الرُغم من تأكده أن زواجه بليان لم يك إلا رغبة مؤقتة فاز بها وبالنفوذ الذي طالما رأى أنه حقه وناله بصفقته مع والدها وأن ما جمعه بها هو الواجب الزوجي وليس الحب إلا أنه لا يقدر على ضياعها منه أو خسارتها أبدًا. فجأة تبدلت مشاعره وغامت عينه وتفجر غضبه وحنقه عليها فضرب مقود سيارته بقوة وصرخ بغضب: - هرجعك وهدفعك تمن رفضك ليا غالي يا منار علشان مش أمجد المُشير اللي تتكلمي معاه ببجاحة وصوت عالي وتطلبي منه الطلاق، وأنتِ المفروض تبوسي إيدك وش وضهر أنه اختارك وحبك ودخلك حياته، والله ونسيت أصلك يا بنت شُهدي ووقفتي قصادي تتهدديني لا وعايزة تحطِ راسك براسي وتتساوى معايا فالنجاح، وماله يا منار مش اطلقتي وخرجتيني برا حياتك غصب عني يبقى استحملي مني أي حاجة بقى. عاد أمجد إلى منزله غاضبًا بعد شروق الشمس، يطبق عليه سخطه من كل صوب وحين ولج غرفته رأى ليان تجلس فوق فراشه بعيون دامعة فزفر بضيق واتجه صوب خزانة ثيابه والتقط منها بنطالًا وأسرع إلى المرحاض بوجه مُكفهر وبعد قليل غادر وقد تبدلت ملامحه كُليًا فبدا وكأن هناك من تلبسه ونظر إلى ملامحها الحزينة واقترب منها وجلس بجوارها والتقط يدها ورفعها صوب شفتيه وقبلها ومد الأخرى إلى ذقنها وأدار وجهها نحو وأردف: - عارف إنك زعلانة مني علشان كان المفروض آجي من بدري ونحتفل سوا بالبيبي اللي ربنا أكرمنا بيه بس غصب عني يا ليان أنا... تعمد أمجد بتر حديثه والابتعاد عنها ونكس رأسه وولاها ظهره فتطلعت ليان نحوه بخوف وحين رأت اهتزاز جسده هرولت ووقفت أمامه وأحاطت وجهه بكفيها وسألته بقلق: - مالك يا أمجد إيه اللي حصل ووصلك للحالة دي، حبيبي أرجوك بلاش تخوفني عليك أنا أول مرة أشوفك زعلان للدرجة دي؟ مد أمجد يده وأدناها منه وضمها بامتلاك قائلًا: - بعد ما مشيتي واحد صاحبي من منطقة سكني القديمة اتصل وبلغني إن في واحد زميلنا اتوفى، بصراحة أنا كنت فاكره عامل مقلب فيا، لكن لما اتأكدت من الخبر مكنتش مصدق فأخدت بعضي ومشيت ومردتش أتكلم معاكِ علشان مكسرش فرحتك، بعد العزا قعدت شوية مع والده ووالدته وبسبب الحالة اللي شوفتهم عليها مقدرتش أرجع على البيت وفضلت ألف فالشارع لحد ما حسيت إن نفسيتي هديت من الخنقة اللي كنت فيها، أنا عارف إن ملكيش ذنب أكسر فرحتك بابننا بس صاحبي دا كان له معزة كبيرة عندي ولحد اللحظة مش متخيل أني خسرته. ربتت ليان وجنته ومسحت بأصابعها فوق شعره وأردفت: - ادعي له يا أمجد وأعمل له صدقة جارية باسمه دي أفضل حاجة تعملها لصاحبك علشان يعرف أنه ساب وراه الصاحب الصالح. التقط أمجد يدها وقبلها وأومأ لها قائلًا: - أنا مش عارف من غيرك يا ليان كان حصل إيه حقيقي أنتِ ونعم الزوجة الصالحة اللي ربنا أكرمني بيها، المهم أنا عارف إن دمي تقيل شوية بس صدقيني هحاول أعوضك عن القلق والخوف اللي اتسببت لك فيهم، بس قصاد كده عايزك فأي زيارة للدكتورة تخديني معاكِ علشان أشوف ابني وأسمع دقات قلبه واطمن عليكِ من الدكتورة، وإن شاء الله لما الدكتورة تأكد لي أن ما فيش أي ضرر عليكِ من السفر هاخدك ونسافر أي مكان أنسيكِ فيه أي حاجة عملتها بقصد أو بدون قصد وزعلتك مني. عانقته بسعادة وقبلت وجنته واستكانت لبعض الوقت بين ذراعيه ولكنها ابتعدت عنه فجأة ونظرت إليه وسألته بغيرة: - إلا البنت اللي اسمها منار ورفضت تشتغل فالمؤسسة ملحظتش أن تصرفها كان غريب؟ يعني واحدة جاية علشان مقابلة شغل المفروض أنها تكون ملتزمة أكتر من كده ولا أنت إيه رأيك؟ حاول أمجد تمالك أعصابه فهو نسى تمامًا أمر رؤيتها لمنار فمط شفتيه وأردف: - مش عارف بصراحة أساسًا أنا بعد ما سألتها عن كام حاجة حسيت أنها مش مظبوطة، حركتها مريبة ونظراتها مريحتنيش، ففكرت أني لو رفضت أنها تشتغل ممكن تستغل الرفض وتطلع تتكلم عن المؤسسة، علشان كده قدمت لها عرض تافهة رفضته وبصراحة أنا استغربت أنها كانت لسه موجودة فالمكتب ولولا أنها مشيت كنت هتطردها. زمت لينا شفتيها ولوحت بإصبعها أمام وجهه وأردفت: - عمومًا بعد كده لما تيجي واحدة تقدم على شغل أرفض أو خلي أي حد تاني يعمل الانترفيو مكانك علشان أنا بغير عليك ومش حابة أنك تتعامل مع أي واحدة. قبض على إصبعها وقبله قائلًا: - وأنا تحت أمرك يا حبيبتي ولو تحبي أنا ممكن امشي أي موظفة فالمؤسسة وأجيب مكانهم رجاله علشان مراتي حبيبتي تبقى مطمنة. وضعت ليان رأسها فوق صدره وأردفت: - لا يا حبيبي أنا بهزر معاك أنا صحيح بغير عليك لكن ثقتي فيك ملهاش حدود. --- لم تدر منار إن كانت ستتجاوز محنتها أم لا؟ ولكن ما تدركه أنها تشعر بالألم يزداد يومًا بعد يوم، وكيف لا وهي تراه الآن بكثرة وكأنه يتعمد أن تتقاطع سبلهما معًا؟ تمنت لو يبتعد ويعطي قلبها الفرصة ليبرأ جرحه، ولكن هيهات فالأمر بات وكأنه يطاردها من مكانٍ لمكان، تارة تراه بجامعتها وتارة بعملها، حتى أيقنت أن وجوده بات لعنة تلازمها ولا تترك لها الفرصة لتنساه. عادت منار منهكة القوى تبحث عن ملاذٍ لها فولجت غرفتها واندست بين ثنايا غطاء فراشها وأخفت به وجهها وأطلقت لدموعها العنان فاليوم رأته كما اعتادت ولكنه كان بصحبة زوجته يعاملها بحنان لم تره منه من قبل ويدللها ويلمسها وكأنها من بلور يخشى عليها من الكسر، ازدادت دموع حسرتها فهو لم يترفق بقلبها ومزقه دون رحمة ولم يأبه به. وأمام فراشها وقفت رنا تحدق بجسدها المهتز بحزن واستدارت عنها واتجهت صوب شقيقتها وزفرت بضيق قائلة: - هو احنا هنفضل ساكتين وسيبين منار فالحالة اللي هي فيها دي، أنا مش عارفة هي هتفضل تعيط وتتعذب لحد أمته دي بقت بتيجي كل يوم من الكلية وتدخل سريرها تستخبى تحت الغطا وتعيط. ربتت هالة كتفها برفق وأردفت: - الموضوع مش سهل عليها يا رنا وأختك محتاجة لوقت علشان تنسى وللأسف احنا ما فيش فأيدنا أي حاجة نعملها غير أننا ندعي لها إن ربنا يهون عليها ويخفف عنها وجعها. عقدت رنا ما بين حاجبيها وأردفت بحدة: - يعني هي تتألم وتتوجع هنا وأمجد عايش حياته ولا على باله، عارفة أنا ساعات بفكر أروح أقول لمراته على اللي عمله فمنار علشان يدوق الوجع زيها لما تسيبه. تجهم وجه هالة وقبضت على كتفي شقيقتها بحزم وأردفت: - إياكِ يا رنا تفكري فِي حاجة زي كده، وأوعي تستسلمي للشيطان وتفتكري إنك لما تكشفيه ويطلق مراته أنك بكده رديتِ حق منار، لا يا رنا أنتِ كده هتبقي وجعتي مراته وبدل ما أختك بس اللي بتتعذب هتبقى مراته كمان، وبعدين متنسيش إن منار قالت إنها حامل يعني كلام زي دا ممكن يأثر فيها ووقتها هيبقى ذنبها وذنب البيبي فرقبتك. احمر وجه رنا خجلًا وخفضت رأسها قائلة: - أستغفر الله العظيم أنا مش عارفة أزاي فكرت كده ربنا يسامحني، بس أنا مكنش فدماغي أي حاجة من دي وكنت فاكرة إن هو بس اللي هيتوجع. هزت هالة رأسها بالنفي وأردفت: - لا يا رنا لو على أمجد فهو مش هيتوجع مهما عملنا علشان هو مرتب نفسه لكل حاجة وإلا مكنش قدر يخدع منار ويخدعنا كلنا طول الوقت دا، ولو على مراته فهي ملهاش ذنب وحرام نأذيها، عمومًا أنا زي ما قلت لك أدعي لأختك وإن شاء الله ربنا هَيخفف عنها ويعوضها عنه بالأفضل. أطرقت رنا برأسها أرضًا وحاولت أن تبعد عن عقلها أمرًا أمجد وزفرت بخوف وعينها تختلس النظر إلى شقيقتها بعجز. ولم تدرك هالة ورنا في تلك اللحظة أن القدر كان له ترتيبه الخاص للأطراف كلهم، فلا شيء يترك للصدفة ولا لعبث الأشخاص، فَـلِكلِ أمرٍ مهما استصغره المرء ثمنًا عليه سداده مهما طال أو قصر الزمن، خاصة حين يمس القوارير الذي أوصى النبي عليه الصلاة والسلام برعايتهن بقوله "استوصوا بالنساء خيرا". وحاشى لله أن يظلم أحدًا أو يترك أمرًا مظلمة دون عاقبة، ومن يظن نفسه سينجو دون حساب فعليه مراجعة نفسه، حتى وإن أمهله الله الوقت سنواتٍ وسنوات، فإنه يُمهله الفرصة ولكنه لا يُهمل أبدا. بعد مرور شهر على طلاق أمجد لمنار وتعمده الظهور بكل مكان هي فيه، أرسل أحدهم وعقد صفقة عمل بينه وبين شركة سامر وها هو بات على موعد جديد معها لِيزكي نيران عذابها فَرؤيته شحوب وجهها وضعفها يزيده نشوة وعليه زيادة معاناتها لِتدرك ما خسرته. خطى أمجد في اليوم التالي بثقة نحو شركة سامر يُمني نفسه بِسداده ضربة أخرى إليها، بينما داخل مكتب سامر جلست منار توضح أهم نقاط تصميمها الأخير في حين أنصت إليها سامر ولكنه صب كامل اهتمامه ونظراته عليها وتفحصها بعينه يتمنى لو تخبره سبب إنطفائها المفاجئ، انتبه سامر بعد مرور دقيقة كاملة لسؤالها إياه عن رأيه بما أخبرته بشأن تصميمها فازدرد لعابه بحرج وأردف: - التصميم روعة وبصراحة أنا بتمنى أنك تمضي عقد وتبقي من ضمن فريق الشركة الهندسي. حدقت به منار بشيء من التيه في بادئ الأمر وحين تفهمت عرضه أدركت أنها بعملها بِشركته ستكون عرضة بشكل أكبر لمصادفة أمجد وهو الشيء الذي باتت تبغضه وتكرهه وتتمنى ألا يقع بصرها عليه مُجددًا، فزفرت بأسف وهزت رأسها مُردفة: - أنا حقيقي مش عارفة أقول لحضرتك إيه؟ بس أصل أنا كنت جاية النهاردة علشان أقدم لك التصميم وأبلغك أني مش هقدر أعمل أي تصاميم تانية الفترة الجاية علشان محتاجة أركز فدراستي بشكل أكبر. باغتته بقولها وبهتت ملامحه وهو ينظر إليها وأدرك من تهربها من مواجهة نظراته بأن الأمر أكبر من احتياجها للتركيز فزم شفتيه وترك مقعده وسألها بقلق: - منار هو أنا ينفع أسألك سؤال شخصي وتجاوبيني بصراحة؟ ارتجفت من نظراته وتراجعت هربًا وهزت رأسها بالرفض ولكنه لم يقبل رفضها واقترب منها قائلًا: - مين السبب فالحالة اللي بقيتي فيها دي؟ استدارت عنه ورفضت إجابته وهمت بمغادرة مكتبه، فسارع سامر واعترض طريقها مُردفًا: - أمجد السبب فالحالة دي مش كده؟ تصلبت ملامحها وهي تبادله النظر وزفرت بقوة قائلة: - لو سمحت يا بشمهندس سيبني أمشي ويا ريت بعد كده تخلي كلامنا فحدود الشغل وبس عن إذنك. تجاوزته لتغادر وليتها لم تفعل فما أن مست يدها مقبض الباب حتى دُفعت بغتة إلى الخلف وقد اختل توازنها فسارع سامر بإسنادها في اللحظة نفسها التي ولج فيها أمجد فوقف يبادل نظره بينها ملامحها الباهتة وبين ساعد سامر الملامسة لخصرها، حينها تمنت منار لو تنشق الأرض وتبتلعها في حين رفع سامر يده عنها معتذرًا بينما ارتسم الجمود على ملامح أمجد الذي عقد ساعديه مُردفًا: - ممكن أفهم إيه اللي بيحصل فالمكتب بينك وبينه يا الأستاذة؟ أثار سؤاله غضبها فرفعت وجهها ونظرت نحوه بكراهية بينما تابع سامر ملامحها وتعجب لنظراتها النافرة وهم بإجابته ليمنعه صوت منار الحانق بقولها: - اسمي البشمهندسة منار مش الأستاذة واللي بيحصل هنا ميخصكش يا بشمهندس فيا ريت تلتزم بحدود اللي يخصك وبس. صفعته بإجابتها واستدارت عنه بإهمال ونظرت إلى سامر الذي ازداد فضولًا ورغبة لمعرفة ما حدث بينهما ليتفاجأ بها تخبره: - أنا مضطرة أمشي يا بشمهندس وبالنسبة لِعرض الشغل أوعدك إني هفكر فيه بجدية بعد ما استشير والدي وهرد عليك فأقرب وقت، وبعدين حضرتك لازم تكون واثق إن مافيش حد عاقل يقدر يرفض عرض مميز زي اللي حضرتك قدمته. مرت من جواره ورمقته باشمئزاز، لم يتحمل أمجد اهمالها إياه ولا تقبل أهانتها له فمد يده وقبض على ساعدها مُتناسيًا وجود سامر، انتفضت منار لِجرأته ونفضت يده بغضبٍ ودفعته عنها ولوحت بإصبعها أمام وجهه تنهره بِقولها: - ألزم حدك يا أمجد وأبعد عني وصدقني لو أتكرر اللي عملته دا أنا هقل منك جامد وأظن أنك مش هتقبل إن منار شُهدي تعلم عليك تاني. ألقت كلمتها الأخير بتهكم واضح وغادرت مُسرعة وخلفت ورائها رجلًا كاد يفتك بها من شدة غضبه، وآخر حاول كبح سعادته كي لا يلحظه غريمه وحاول أن يشتت انتباه أمجد ولكنه تفاجأ به يسرع بمغادرة مكتبه بوجه ينذر بحلول كارثة، لم يتمهل سامر أو يُفكر بعقابة قراره ولكنه لبى نداء قلبه وتبع حدس عقله وغادر متتبعًا خطوات أمجد الذي عمى الانتقام قلبه وغيب عقله وزفر بارتياح حين فشل أمجد في اللحاق بها، ولكن ما زاد سامر قلقًا واسترعى انتباهه رؤيته أيمن يطرق نافذة سيارة أمجد قبل إنطلاقه وحديثه معه بوجه متجهم فتوارى سامر عن النظر وأدرك سبب رفض أيمن لتصميم منار لذا قرر ملاحقة أمجد ومواجهته. (10) كيد مرودو. ولجت منار إلى منزلها بجسد منتفض ووجه شاحب واستندت إلى باب مسكنها مغمضة العين لا تصدق رؤيتها لتلك الكراهية بعينه بل وأحستها منه والتي جعلتها حتى اللحظة تتساءل من منهما الضحية ومن الجلاد كي ينظر إليها وكأنها هي من قامت بخيانته وليس العكس، لم تنتبه منار في خضم خوفها الأعين التي حدقت بها بقلق فَفتحت عينيها فجأة بعدما أحست بأن هناك من ينظر إليها لِتتفاجأ بِشقيقتها عفاف تجلس وبِجوراها أخوتها، فكان أوان إخفاء ذعرها قد فات حين هبوا على أقدامهم وسارعوا إليها مخطفين إياها بين أذرعهم ليشكلوا حولها درعًا أذهب روعها عنها وجعل أنفاسها تهدأ ودموعها تتريث، وتلاقت عينا منار بعين عفاف لِوهلة أحست بعين والدتها تتفحصها فارتمت بين ذراعيها تنشد اشتمام رائحتها فيها وأغمضت عينها وسردت بصوت ممزق ما حدث لها وما مرت به على سمعهم جميعًا، وبِالخارج وقف شُهدي بأنفاس ثائرة ينصت إلى لوعة ابنته وهي تخبرهم بِمكنون صدرها فَأطرق لثوان استدار بعدها وغادر وقد عزم على حماية ابنته مهما كلفه الأمر. وقف شُهدي أمام مؤسسة علام يحدق بالبناية بوجه متجهم وتقدم نحو رجل الأمن وأردف: - لو سمحت أنا عايز أقابل المهندس أمجد المُشير أو صاحب الشركة الدكتور علام. ابتسم الرجل بمودة وأجابه: - والله يا أستاذ للأسف المهندس أمجد مش موجود النهاردة والدكتور مالوش أي مواعيد، عمومًا حضرتك ممكن تدخل مكتب السكرتارية وهما يحددوا لك ميعاد. ازداد تجهم شُهدي واتبع الإرشادات فَاستقبلته سميرة بابتسامة هادئة واستمعت إلى سؤاله وأجابته بهدوء: - لو حضرتك عايز تقابل المهندس أمجد فَهو هَيكون موجود على الساعة خمسة، بالنسبة للدكتور علام فَحضرتك ممكن تسيب كامل بياناتك وهَنبعت للدكتور وهو اللي هَيحدد الميعاد بِنفسه وهنبلغك. رفع شُهدي عينه وتطلع إلى ساعة الحائط أمامه وزفر بضيق فما زال الوقت مُبكرًا على عودة أمجد وليس بيده شيء يفعله غير الانتظار، فَأومأ لها وجلس خارج مكتبها عازمًا على مقابلته. ما أن صف أمجد سيارته أمام بوابة المؤسسة الرئيسية حتى صف سامر هو الآخر سيارته بِمواجهته وغادرها بوجه مُكفهر واتجه صوبه فَزم أمجد شفتيه وأشار إليه برأسه لِيتبعه، وما كاد أمجد يخطو نحو مكتبه حتى لمح شُهدي يجلس خارج مكتب السكرتارية فَعقد ما بين حاجبيه وكاد يتراجع لِمعرفته سبب وجود شُهدي فمن المؤكد أنه جاء لِمواجهته ومنعه من ملاحقة ابنته، لِيقطع سامر عليه طريق العودة في اللحظة نفسها التي رآه شُهدي فيها فَوقف بوجه عابس ينذر بالشر واتجه نحوه وواجهه قائلًا بحدة: - تحب نتكلم هنا يا بشمهندس ونخلي اللي ما يشتري يتفرج ولا نتكلم برا أحسن. تلفت أمجد حوله بقلق وأشار لِشُهدي بِمرافقته إلى الخارج لِيمنعه من فضحه وتاه عنه وجود سامر الذي لم يشأ تفويت الفرصة بعدما نبأه حدسه أن ذلك الرجل على صلة وثيقة بمنار، وبالخارج وقف شُهدي بِملامح قدت من حجر يرمقه بنفور لِعلمه أنه لن يردعه عن ابنته إلا الخوف، الخوف من خسارة ما جمعه فَزفر شُهدي مُستجمعًا قواه وبادره بقوله: - بص يا ابني أنا طول عمري بِعاملك بِما يرضي الله وكنت بِعتبرك زي أحمد ابني وفتحت لك بيتي وأمنتك على بناتي وكنت فاكرك هتصون العشرة والمعروف اللي بينا لكن أنت لفيت من ورا ضهري وشاغلت بنتي ووقعتها فحبك، ورغم كده سامحتك وأديتك فرصة تانية تثبت لي فيها حُسن نوياك ووافقت تخطب منار وتكتب كتابك عليها وقلت أنك أكيد راجل زي والدك الله يرحمه وهتحافظ عليها، لكن عرفت معاك إن القول حاجة والفعل حاجة تانية علشان القول للي شبهك بتوع مصلحتهم إنما الفعل للرجاله اللي أنت بعيد عنهم ولا تمت لهم بِصلة. زفر أمجد بحدة ورمقه شذرًا فَرفع شُهدي حاجبه بتحدي وأستطرد قائلًا: - على فكرة أنا مش هَخاف من نظرة الغضب دي ولا من المركز اللي وصلت له بالدحلبة والضحك على الدقون ولا كمان يفرق معايا العنجهية الكدابة اللي محاوط بيها نفسك، أنا جايلك راجل لراجل يا ابن المُشير وخلاصة قولي ليك أنك لو مشلتش منار من دماغك وسيبتها فِحالها وبعدت عنها أنا هَخليك تخسر الهيلمان اللي أنت عايش فيه وهَعمل اللي بناتي استحرموا أنهم يعملوه فيك وهَروح لحد بيتك وهفضحك قصاد حماك الدكتور ومراتك، ومش كده وبس لا دا أنا هفضحك فكل مكان حتى الجامعة وعلى النت وهَخلي أصغر عيل يبص لك باستحقار، فاتقي شر الحليم إذا غضب يا أمجد وأبعد عن طريق بنتي علشان مترجعش تندم وأحمد ربنا أني سيبتك تروح لحال سبيلك من غير ما أحاسبك على اللي عملته فبنتي ووجعك ليها وقهرتها وكسرة قلبها. أنهى شُهدي قوله واستدار مُغادرًا وتابعه أمجد بعيون قاتمة وهو يلعنه واشاح بوجهه أخيرًا لِيصدمه وقوف سامر على مقربه منه يحدجه باشمئزاز، وقبل أن ينبث بكلمة غادره مُسرعًا بخطواته حتى لحق بِشُهدي وسار بجواره فالتفت شُهدي نحوه ونظر إليه بحيرة فابتسم سامر ومد يده نحوه وصافحه قائلًا: - سامر عثمان مدير الشركة اللي بنت حضرتك بتشتغل فيها، كنت حابب اتكلم مع حضرتك فموضوع مهم فإيه رأيك لو نقعد فأي كافيه ونشرب القهوة سوا؟ --- "وَمَا رَبُّكَ بِغَٰفِلٍ عَمَّا تَعْمَلُونَ" ليته أدرك معناها وتدبره ولكنه طغى وافترى، فما أن ولج أمجد مكتبه حتى التقط هاتفه وضغط بضعة أزرار وحين أجابه الطرف الآخر بادره بقوله: - عايزك تطرد شُهدي أبو منار من المصنع وتلبغ المعلم شكران يستغنى عن خدماته، وتجمع كل الديانة اللي شُهدي مديون لهم وتقولهم أني عايز أقابلهم ضروري. أنهى أمجد محادثته وارتمى فوق مقعد مكتبه وأردف بكراهية: - وماله أما نشوف هتاكل أنت وعيالك منين يا عم شُهدي، وأبقى وريني هتعمل إيه لما يقبضوا عليك بسبب إيصالات الأمانة اللي عليك. وعلى الجانب الأخر جلس حمدان يحدق بهاتفه يحاول استيعاب كلمات أمجد، فهو حين لجأ إليه عدة مرات لم يخيل إليه أنه سيطلب منه طرد شُهدي نظير مساعدته له، فهب على قدميه وسار نحو بوابة المدبغة فاستقبله شكران بالترحاب ولكنه ما أن وقع بصره عليه حتى سأله باهتمام عما أصابه، فجذبه حمدان بعيدًا عن السمع وقص عليه كل شيء. توالت الأيام ثقيلة على شُهدي حتى مر أسبوع وهو يبحث عن عمل من مكان لمكان فبائت كل محاولاته بالفشل فعاد يجر أذيال الخيبة إلى منزله، بينما اتسعت ابتسامة أمجد ومراقبه يصف له المشهد فأمر بملازمة شُهدي كظله وأنهى الاتصال وسمح لسكرتيرة مكتبه بإدخال الرجال واستقبلهم بِكِبر وجلس أمامهم متفاخرًا بنفسه وبادرهم بعرضه فتبادلوا النظرات بحيرة حتى قطع أحدهم الصمت بقوله: - يعني حضرتك عايز تدفع كل ديون شُهدي ونسلمك إيصالات الأمانة؟ أومأ أمجد تأكيدًا فزوى الرجل حاجبيه قائلًا: - معلش يا بشمهندس بس أنا عندي فضول أعرف أنت هتستفاد إيه لما تدفع فلوس معودمة؟ لمعت عين أمجد بشماتة وأجابه بإيجاز: - هستفاد كتير، المهم أنا مستني أسمع ردكم موافقين تسلموني إيصالات الأمانة وتاخدوا فلوسكم ولا لا؟ فجأة وبدون مقدمات ولج ضياء الغرفة وجال بعينه بين الحضور حتى حط بصره على أمجد الذي هب على قدميه واتجه صوبه مرحبًا فازاحه ضياء بإهمال وتجاوزه متخذًا مكانه على رأس الطاولة، فازدرد أمجد لعابه لِتصرفه الغريب واستدار مواجهًا الحضور وأردف بتردد: - زي ما قلت لكم أنا هستنى ردكم ولو وافقتم هبعت لكم الفلـ... ابتلع أمجد باقي كلمته حين فاجأه ضياء بقوله: - ومين قالك إن في حد من الرجالة ممكن يوافق على عرضك يا بشمهندس؟ اضطربت ملامحه وزاغ بصره بين ملامح ضياء القاتمة ونظرات الأسف من ضيوفه، فردد بتلعثم: - مـ ـش فـ ـافـ ـهـ ـم حـ حضرتك تقصد إيه؟ ضغط ضياء زرًا جانبيًا والتفت نحو الباب فاستدار أمجد بتوجس فصدمته رؤيته لشُهدي يلج إلى الداخل ويتبعه مراقبه، فتراجع بحيرة وأردف بحدة: - أنت إيه اللي جابك هنا؟ هز شُهدي رأسه بأسف واتجه صوب ضياء وصافحه قائلًا: - أنا مش عارف أشكر حضرتك أزاي على معروفك معايا أنا... منعه ضياء من إكمال قوله رابتًا كتفه برفق ومردفًا: - متقولش حاجة يا راجل يا طيب وبعدين أنا معملتش أي حاجة، والفضل بعد ربنا يرجع للمعلم حمدان اللي ربنا بعته ليا نجدة من السما علشان يفتح عيني على حقيقة البني آدم دا. شحب وجه أمجد ما أن أنهى ضياء قوله وأدرك أنه كُشف أمامه وخسر كل شيء ولم يعد له مكان، وتابع مغادرة الرجال واحدًا تلو الأخر بقلق في اللحظة نفسها التي اتجه ضياء نحوه ووقف بمواجهته مُردفًا: - أنا مش عايز أعرف أنت ليه عملت كده، أنا بس عايز أعرف ليان بنتي ذنبها إيه علشان تخدعها وتغشها وتكسرها بالشكل دا، بنتي عملت لك إيه وحش علشان يكون جزائها الغدر. أطرق ضياء رأسه بحزن فاتجه شُهدي نحوه وأردف: - لا بنتي ولا بنتك كان ليهم ذنب، والذنب ذنب طمعه اللي خلاه يفتكر أنه يقدر ياخد كل حاجة من الدنيا، فقرر ياخد المال والجاه والنفوذ لما يتجوز بنتك وياخد القناعة والزوجة اللي تسهر على راحته لما يتجوز بنتي. رفع ضياء رأسه ونظر إليه وأردف: - أنا لحد دلوقتي مش قادر أواجه ليان بالحقيقة وسيبها عايشة معاه على عماها، ومش عارف لو عرفت أني أنا اللي بعتها للبني آدم الخسيس دا هتعمل إيه، أنا مرعوب يا حج شُهدي وخايف عليها ليحصل لها حاجة، بنتي على قد ما تبان قوية وصريحة وبتوصل لهدفها على قد ما هي حساسة وهشة وبتنكسر من أقل حاجة. أحس شُهدي بالعجز أمام ضياء فقد هزمته دموعه وكربه، بينما لزم أمجد مكانه لا يدري لِما يقف هكذا دون حراك وكأنه كائن بلا حول أو قوة، ليصدمه ضياء بقوله: - للأسف أنا مش بأيدي أي حاجة أعملها فالوقت الحالي ومجبر أسكت ومتكلمش واتحمل وجود البني آدم دا علشان خاطر ليان اللي لو عرفت الحقيقة ممكن يجرى لها حاجة خصوصًا بعد ما الدكتورة كلمتني وقالت إن حملها حرج وأي أنفعال خطر عليها. حاول أمجد الذي استمع إلى كلمات ضياء استمالته ولكنه صد محاولته هادرًا به بغضب: - أنت تخرس وإياك تفتكر إنك لوي دراعي بتعب بنتي ولا ماسك عليا ذلة ولا تقول فنفسك أنك تقدر تبتذني، لا يا أمجد فوق وشوف أنت واقف قصاد مين أنا ضياء علام وبكلمة مني أرميك ورا الشمس وأسجنك، ولازم تعرف إن اللي رحمك من انتقامي ومانعني عنك أني مخليك لحد ما ليان تشد حيلها وتولد وبعدها هطردك فالشارع اللي جيت منه وهعرفها حقيقتك وحقارتك، ومن دلوقتي لحد ما ليان تولد أنت كل المطلوب منك أنك تبقى أراجوز فحياتها تفرحها وتسعدها وتكون خدام تحت رجلها وبس، وحط فعقلك إن لو خيالك وزك فمرة وفكرت أنك تلمح لها بأي حاجة ساعتها أنا همحيك من على وش الدنيا فاهم. اتسعت عينا أمجد وأحس بالذلة أمامه والضعف فنظرات ضياء أكدت أنه قادر على تنفيذ تهديده وأنه لن يتردد بزجه في السجن إن أخطأ، فأومأ بخزي ليجهز عليه ضياء مُسددًا ضربة أخرى إلى كبريائه المزعوم بقوله: - اعتبر نفسك فأجازة مفتوحة لحد ما ليان تولد وكل اللي هتقوله قصادها إنك اتفقت مع تلاتة مهندسين هيمسكوا الشغل علشان تفضى ليها وتراعيها بنفسك، دا بالنسبة للشغل أما منار بنت الحج شُهدي فأياك يا أمجد تحاول بس إنك ترفع عينك فيها مرة تانية ولا تقرب منها، منار خط احمر محظور عليك تجاوزه فاهم. أطرق أمامه كعبدٍ ذليل لا يقوى على الرفض وحين أشار إليه بالإنصراف استجاب اتقاءًا للمزيد ليوقفه ضياء قبل تجاوزه باب المكتب قائلًا: - على فكرة أنا قلت لليان إن الدكتورة أمرت بانفصالك عنها خلال فترة حملها حفاظًا على حياة البيبي، فياريت أول ما توصل البيت تنقل حاجتك وتنام بعيد عن بنتي وعلى فكرة أنا حطيت كاميرات مراقبة فكل شبر فالبيت فيا ريت تخلي بالك من تصرفاتك لإنها متراقبة ودلوقتي اتفضل وجودك معدش له أي لزوم. --- بعد ساعات ولج شُهدي إلى مسكنه فوجد زوج ابنته الكبرى يجلس بجوارها بوجه متجهم فزم شفتيه واتجه إليه وصافحه وجلس بجواره وسأله عما به، فزفر عادل وأشار إلى غرفة ابنته قائلًا: - عفاف منشفة دماغها يا عمي ومش عايزة تسمع كلامي وترجع معايا حتى بعد ما قلت لها إنها وحشت الولاد. زفر عادل بيأس وهز رأسه باستسلام مُردفًا: - أنا تعبت يا عمي ومبقتش عارف أراضي عفاف ولا أراضي والدتي، علشان كل واحدة فيهم شايفة إن التانية هتسرقني منها وكتير حاولت أوضح لهم أن كل واحدة ليها حب مختلف عن التانية جوايا ديروا وشهم عني، خصوصًا والدتي اللي اتكلمت معاها ودخلت خالي فالموضوع علشان يقعنها تفضل معاه، بس رفضت وياريتها رفضت وخلاص لا دي كل ما تشوف وشي تدعي عليا وتقول قلبي وربي غضبانين عليك يا عادل، فدلني يا عمي أعمل إيه معاهم هما الاتنين علشان أرتاح واريحهم. جال شُهدي بعينه فوق ملامح عادل المجهدة ولاحظ عينه التي أحاط بها السواد فمال نحو أذنه وأردف: - عايز تسمع نصيحتي علشان ترتاح؟ أومأ عادل بلهفة كالغريق الذي وجد قشته، فابتسم شُهدي بمكر وأردف هامسًا: - أخبط دماغ الاتنين فبعض وقول لهم أنك زهقت من الوضع وهتاخد الولاد وترجع لوحدك، وخد ولادك من الشقة وروح أقعد يومين فأي حته استجم وغير جو وأقفل موبايلك، وسيب الوساوس والخوف يعلمهم الدرس طالما الاتنين بيعاندوا فبعض على حسابك. اتسعت عينا عادل بصدمة ليومئ في النهاية وقد تبدلت ملامحه كُليًا ووقف قائلًا: - أنا هعمل بنصيحتك يا عمي وهاخد الولاد يومين عن إذنك. ومن مكانه لمح شُهدي ابنته الصغرى فأشار إليها وأردف: - عايز وكالة روتير تذيع إن أبيه عادل ناوي يرجع الكويت بالولاد لوحده وأنه قرر يريح دماغه ويسيب عفاف ووالدته هنا، دا غير أنه ناوي يروح شرم يقضي يومين استجام مع الولاد قبل ميعاد السفر، هَتعرفي ولا أشوف وكالة غيرك؟ تصنعت رنا الحزن لثوان سرعان ما ابتسمت وأجابته بثقة: - اعتبره حصل يا والدي بس بشرط لا هو مش شرط هو تمن خدمات، لو أبيه عادل ناوي يروح شرم بجد توافق أني أروح معاه. مد شُهدي يده وقرض أذنها قائلًا: - بتساوميني يا رنا. حاولت رنا تخفيف ضغطه على أذنها قائلة: - مش بساومك يا والدي بالعكس دا أنا هساعدك على اللي أنت عايز تعمله فعفاف وهساعدك فموضوع سامر كمان. ضربها بخفة خلف رأسها وأشار إليها بالذهاب فوقفت بعناد أمامه عاقدة لساعديها فلم يجد شُهدي غير الموافقة على طلبها فتهلل وجهها بالسعادة وقبلت وجنته قائلة: - ربنا ميحرمكش مني أبدًا يا بابا. وتم لِشُهدي ما يريد وزكت رنا نيران الغيرة يومًا تلو الآخر بقلب شقيقتها عفاف التي حاولت التماسك ولكنها لم تستطع، فزوجها قرر هجرها وما زاد الأمر سوءً عليها هو عدم مبالاة ابنائها وكأنهم سعداء بقرار والدهم بإقصائها عنهم، بتلك اللحظة ربتت منار كتفها وأردفت: - بطلي تكابري وتعاندي فنفسك ومع جوزك وقومي روحي راضيه طالما مظلمكيش. رفعت عفاف وجهها إليها وأردفت: - وأنا عمري ما قلت إن عادي بيظلمني لكن وجود والدته وتدخلها فكل كبيرة وصغيرة خنقني يا منار دي مش بتسيب حاجة إلا وتسأل وتدخل وعايزة تمشينا على مزاجها وأنا تعبت أعيش حياتها هي على حساب حياتي. تابعت منار حركات شقيقتها المضطربة وأردفت: - عارفة يا عفاف أنتِ مشكلتك فين؟ حدقت عفاف بها بتساؤل فزفرت منار قائلة: - مشكلتك أنك شيفاها عايزة تعيشك على مزاجها، علشان كده مش متقبلة أي حاجة منها وهي شايفة أنك أخدتي ابنها منها خصوصًا لما سافر وسابها، علشان كده كل واحدة فيكم شايفة التانية عدوتها على الرغم من إنك لو سألتي نفسك هتعملي إيه كمان كام سنة لما ولادك يكبروا وكل واحد يعيش حياته وتلاقي نفسك بعيد عنهم هتعرفي أنها ست فجأة لقت نفسها لوحدها بعد ما ولادها كل واحد بعد عنها والحياة سرقتهم منها. أطرقت عفاف تفكر بكلمات شقيقتها لتنتبه لقولها: - حبيها يا عفاف واتقبلي وجودها واحتضنيها واتعاملي معاها على أنها ماما وقتها هتلاقي حياتك بقت أسهل وأريح وكل واحدة بتكمل التانية علشان الحياة تمشي، وازرعي جوا ولادك أزاي يبروا بيكم ببرك بوالدة عادل. غادرت منار غرفتها فوجدت والدها ينظر إليها سعيدًا فابتسمت بحرج وأردفت بهمس: - عرفت تلعبها صح يا بابا عمومًا اطمن عفاف دقيقة وهتلاقيها راجعة تقعد مع حماتها وهتعرف تحتوي كل حاجة من تاني. ربت شُهدي كتفها وقبل جبهتها قائلًا: - طيب وأنتِ يا قلب بابا مش ناوية تطمني قلبي عليكِ؟ ازدردت منار لعابها لتخفي غصتها وابتسمت بزيف قائلة: - ما أنا بحاول يا بابا عمومًا كلها سنة وأخلص وتشوف منار تانية خالص. جذبها شُهدي لتجلس بجواره وأردف: - أنا عارف أنك لسه موجوعة يا بنتي ومش عارفة تتأقلمي على الحياة من غيره بس هو... وضعت منار يدها فوق شفتي والدها وأردفت: - بابا أرجوك متجبش سيرته ولا تتكلم عنه تاني حقيقي أنا مش متقبلة أسمع اسمه خصوصًا بعد ما عمو حمدان جالك وقالك على اللي عايز يعمله فيكِ ولولا أنه وعمو شكران والناس اللي ليها فلوس عندك عندهم ضمير كان زمانه أذيك. انهمرت دموع منار ونكست رأسها بخزي وهتفت بلوعة: - أنا لا يمكن كنت هسامح نفسي لو أمجد أذاك ولا مسك بسوء وصدقني من لحظة ما عرفت أنه كان بيخدعني وبيمثل عليا الحب وهو سقط من نظري ويمكن من قبلها من يوم ما عرفت أنه السبب فضياع الفرص مني علشان كان خايف من نجاحي وظهوري. كفكف شُهدي دموعها وأردف: - صدقيني يا بنتي البني آدم دا ميستحقش دمعة واحدة تنزل من عينك علشانه وربنا رحيم بيكِ أنه كشفه قبل ما تتورطي أكتر معاه ويا عالم لو كان اتجوزك كانت حياتك هتبقى شكلها إيه معاه. أومأت منار قائلة: - أنا بحمد ربنا ليل نهار وبصلي كل ليلة وبشكر ربنا أنه كشفه ورحمني من ابتلاءه. أحاط شُهدي وجه ابنته وأردف: - طب وسامر يا منار؟ هربت منار من ملاحقة عينه لها وأردفت: - لسه بدري على أي خطوة يا بابا والمهندس سامر أنا بحترمه بس حاليًا هبقى بخدعه وبظلمه وبظلم نفسي لو قلت أني ممكن أقبل بيه فأرجوك أديني وقتي أنسى ووجعي يخف قبل ما أفكر فموضوع الارتباط وليك وعدي وكلمتي إني لو فأي وقت حسيت بأي مشاعر ناحيته أو ناحية أي حد تاني هتكون أول واحد أتكلم معاه حتى قبل ما أتكلم مع نفسي. الخاتمة.. بدت حياة منار تسير بنجاح ما بين دراستها وعملها الذي رسخ أقدامها بين أقرانها من كبار المصممين والمهندسين، وها هي بعد عام أوشكت خلاله على إنهاء مشوار دراستها الأكاديمي تشعر أنها نالت ما صبت إليه نفسها خاصة بدعم والدها ومعاملة سامر الراقية لها، فعلى الرغم من رفضها الارتباط به إلا أنه عاملها بحيادية ودفعها لتقدم أفضل ما لديها وزاد ثقتها بنفسها بما أضافه لها من مسؤولية فجعلها ترى نفسها بصورة مخالفة لما كانت تراها، باتت أكثر ثقة وجدية مما جعلها تنظر نحوه من منظور آخر، ولكنها أبت أن تعطي لقلبها الفرصة لينبض من جديد فما زال جُرحها الغائر ينزف سرًا. بينما دفع ضياء ليان لِتعود إلى عملها وتشاركه مسؤولية المؤسسة وهو الأمر الذي أعادها للحياة بعدما غمرها بمحبته وأغدقه عليها بِرعايته أكثر من السابق، فبدأت ترى كل شيء بصورة أوضح ولم يعد لأمجد هيمنة على أفكارها وقرارتها، وباتت لا تذكره إلا لِملمًا بل أصبحت تراجع تصرفاتها السابقة لِتدرك أنها كانت على خطأ يوم سقطت في حب صورة زاهية الألوان لا معنى لها. وبأحد الأيام وبينما هي تجلس وتداعب صغيرها أحمد أختلست النظر إلى والدها وزفرت تستحضر شجاعتها وأردفت: - بابا هو أنا لو طلبت الطلاق من أمجد حضرتك هتزعل؟ لاحق ضياء ملامحها بحثًا عن بوادر ندم ولكنه لم يجد إلا الراحة والرجاء بعينها فابتسم قائلًا: - متأكدة من قرارك دا يا ليان؟ أومأت بحرج وأجابته: - بصراحة يا بابا دا أكتر قرار أنا متأكدة منه وشايفه أنه الأصح ويمكن كمان أكون متأخرة أني أخده. تطلع ضياء إليها بحيرة وسألها عما تعنيه فأطرقت برأسها قائلة: - بابا أنا مش هخبي على حضرتك أنا ليا فترة براجع حياتي يمكن من يوم ما رجعت أشتغل فالمؤسسة من تاني واحتك بالحياة العملية، وبصراحة أكتر أنا اكتشفت أني انبهرت بالهالة اللي كانت حوالين أمجد ووهمت نفسي أني حبيته، وللأسف عشت معاه الكام سنة اللي فاتوا وأنا تحت تأثير سكرة الحب وأدماني معاملته ليا. رفعت ليان وجهها وواجهت والدها بنظراتها وزفرت بقوة واستأنفت حديثها: - فاكر يا بابا اليوم اللي اتكلمت معاك فيه وكلمتني عن زوجات سيدنا محمد عليه الصلاة والسلام، أهو أنا من اليوم دا وبالتحديد من اللحظة اللي دعيت فيها ربنا أنه يرفع عن عيني الغشاوة، وأنا بدأت أفوق لنفسي وأشوف أمجد بصورة تانية غير اللي كنت بشوفه فيها، خصوصًا لما بقى قاعد معايا ليل نهار وقال إنه عايز يراعيني بنفسه، مش عارفة ليه بقيت بحس بنفور ناحيته ومكنتش بحس بالراحة لما يقرب مني؟ ولما قال إنه مسافر وقتها حسيت بالراحة وحمدت ربنا أنه بعده عني علشان كده أنا عايزة أطلق منه وأعيش لنفسي ولابني، ولو ربنا كتب لي أني يكون لي نصيب مع حد تاني أكيد هَفكر كويس وهَختار حد ميلغيش شخصيتي ولا يهمشني ولا يخدر مشاعري بشوية كلام على الفاضي. جاءت إجابة ضياء على طلبها مختلفة عما توقعته ليان فهي تعلم مبلغ حب والدها له ولكنه بدد مخاوفها بضمه إياها إلى صدره وربته ظهرها، فأحست بالأمان خاصة حين سمعت همس حمده لله، ولم تدرك أن والدها كاد يسجد لله شكرًا لإزالة الغشاوة عن عينها ورؤيتها حقيقته دون الحاجة إلى معرفتها بما فعله ذلك النذل. بينما باءت حياة أمجد من سيئ إلى الأسوأ خاصة بعدما تفنن ضياء بإذلاله وأفسد حياته وبدلها من أقصى اليمين إلى أقصى اليسار، فبات بلا عمل وبلا مستقبل وأضحى ظلًا لا كيان له، كما أجبره على الرحيل قبل ولادة ليان مدعيًا سفره إلى الخارج ليُفاجأه بتوفيره له فرصة عمل لا يرقى إليه أبدًا بإحدى القرى النائية نظير انفصاله الصامت عن ابنته وعدم الزج به إلى السجن. وكعادته مؤخرًا توارى مراقبًا إياها بعدما فاق اشتياقه إليها كل حد وتابعها ببصره وهي تسير نحو مقر الشركة وتمنى لو كان يملك من الشجاعة ما يجعله يواجهها ويطلب منها الصفح بعدما أدرك حجم خسارته التي لم يستطع تخطيها، لمحته فأوقفت خطواتها ونظرت نحوه للحظات ثم أشاحت بعينها عنه وتابعت سيرها ولكنه حسم أمره واعترض طريقها، وكما توقعت فعل وقف أمامها يرجوها باستعطاف فتطلعت إليه بحيرة وكأنها تراه للمرة الأولى، فجأة تساءلت أين ذهب شغفها به ولهفة قلبها ونبضاته المتسارعة لِرؤيتها إياه؟ وأين تلك الغصة التي علقت بمنتصف حلقها تُذيقها المرار منذ افترقت عنه؟ ضيقت منار ما بين حاجبيها وحاولت إيجاد تفسير لما تشعر به من فتور نحوه، فأتتها الإجابة واضحة كضوء الشمس تُنير بصيرتها وإدراكها وجعلتها ترى بوضوح أنها سجنت نفسها طوال العام المنصرف بين جدران محبتها له ومحاولتها إيجاد الخطأ والعيب بشخصها الذي دفعه للتخلي عنها، لِتلعن سذاجتها فهي لم تخطأ وقلبها لم يُجرم بل أحبت وأخلصت وهو غدر وخان، وإن كان على أحدٍ منهما أن يشعر بالذنب فهو من عليه الشعور بخزي الذنب وليس هي. ومن نافذة مكتبه رآه يظهر من العدم أمامها فانتفضت الغيرة بداخله ودفعته دفعًا إلى الخارج بعدما اشتعل قلبه خوفًا من عودته، بينما حاول أمجد إيجاد كلماته التي رتبها أيامًا لِيُخبرها بِافتقاده لها ولكنه فشل وتاه بظلمات نفسه لتزيده منار بأسًا بإحباطها محاولته وهي تخبره بهدوء ووجه مبتسم: - شكرًا بجد أنا مش عارفة أشكرك أزاي على جميلك بِظهورك دلوقتي في اللحظة دي بالذات. لوهلة ارتجف قلبه وظنها تمنحه فرصة الغفران ولكنها بددت ظنه بإضافتها: - عارف أنا لو مكنتش شوفتك دلوقتي كنت هفضل ظالمة نفسي وأنا بدور على الغلط اللي عملته وخلاك تروح لوحدة تانية، ياه يا أمجد أنت متعرفش أني بمجرد ما شوفت فهمت أني معملتش إلا حاجة واحدة بس غلط وهي أني حبيتك، أيوه تخيل أنك الغلطة الوحيدة اللي غلطتها والحمد لله أنك صلحت غلطتي لما بعدت عني، عارف أنا أول ما هطلع المكتب هَتوضى وهَصلي ركعتين شكر لله أنه خلاني أفوق قبل ما حياتي تضيع مني على الفاضي. بهتت ملامحه وفغر فمه من صدمته لِكلماتها فهو لم يتخيل قط أن تتبدل منار وتصبح بتلك الصورة الرائعة التي يراها عليها فازداد ندمه لِخسارته لها وأردف: - أنا عارف أني أذيتك كتير يا منار وعارف أن ماليش الحق أقف قصادك دلوقتي خصوصًا بعد موقفي الأخير من عمي شُهدي، بس والله الفترة اللي فاتت دي خلتني أعرف قيمتك وأعرف أنك النعمة اللي كان لازم أحافظ عليها، علشان كده جيت لك ومش مكسوف أني أقف قصادك وأنا ندمان وأعترف لك بغلطي وأطلب منك فرصة أخيرة أصلح فيها كل أخطائي بحقك وحق عمي شُهدي و... زادته ابتسامتها التي نبتت فجأة فوق شفتيها حيرة فأوقف حديثه وتطلع إليها بدهشة، لِتضربه منار في مقتل بقولها: - أمجد أنا أسفة بس أنت حقيقي صعبان عليا ومن واجبي أني أوضح لك حاجة غابت عن تفكيرك وأنت جاي على هنا، إن اللي واقفة قصادك دي مش هي منار اللي كنت بتهددها أنك هَتسيبها فَتخاف وتعيط وتوطي تبوس إيدك علشان تفضل معاها، لا يا أمجد اللي واقفة قصادك واحدة تانية واحدة فهمت إن الحياة مش مهم تلاقي فيها الحب على قد ما هو مهم جدًا تلاقي فيها الاحترام والتقدير والأمان، وحقيقي أنا بحمد ربنا أنه شال الغشاوة من على عيني وبطلت أحبك، ولو على أحترامي ليك فهو معدش موجود من بعد ما هدمت كل حاجة حلوة ليك جوايا ومسبتش فِقلبي غير القهرة والحسرة، علشان كده من واجبي أقولك فوق لنفسك احنا ما فيش حاجة باقية بينا غير الوادع. القت قولها وتجاوزته فالتفت وتابعها بعيون مُنكسرة تسكنها الدموع وراقب اقترابها من سامر بغيرة تنهشه، وأدرك من نظراته إليها مدى عشقه لها فنكس رأسه وخطى بالطريق المعاكس يجر أذيال خيبته، بينما تهادت منار بِخطواتها نحو سامر فرأت بعينه ألسنة لهيب الغيرة تتقافز منها فابتسمت بحرج وسألته بهدوء: - واقف كده ليه يا بشمهندس زي ما يكون في حاجة ضايعة منك وبتدور عليها؟ ظنها تسخر منه فرمقها بضيق وهم بإجابتها ولكنها منعته بإضافتها: - على فكرة أنا خلصت تصميم الديكور الداخلي والروف اللي حضرتك طلبتهم مني. زفر وأشاح بوجهه وخطى بعيدًا عنها بضع خطوات ولكنه عاد وتوقف والتفت إليها وأردف بغيرة واضحة: - أمجد كان عايز إيه منك يا منار؟ للمرة الأولى منذ أشهر طويلة تشعر بالسعادة تداعب قلبها لاهتمامه الواضح بها وغيرته الهادئة ولكنها تداركت سعادتها وأجابته بسؤالٍ آخر: - وحضرتك بتسأل ليه؟ ازداد وجومه وأحسها تتهرب منه فأردف بحزن: - هو أنتِ بجد مش عارفة أنا بسألك ليه؟ زفر بقوة حين ازدردت لعابها وأضاف: - واضح أني كنت بخدع نفسي طول الفترة اللي فاتت وفاكر أنك لما تعرفيني كويس وتتعرفي عليا وتفهميني هتقدري تفرقي بيني وبينه وهتشوفيني بالطريقة اللي نفسي تشوفيني بيها وتحسي بمشاعري ليكِ و... قاطعته بجدية بعدما أدرك عقلها أنها بطريقها لِخسارته: - على مهلك يا بشمهندس واسمعني كويس بالنسبة لإجابة سؤالك فأنا كنت بشكر أمجد علشان أنا لو مكنتش شوفته كنت هفضل فاكرة أني لسه مجروحة وموجوعه منه، وفهمته إن معدش له أي وجود فحياتي وإني معدتش متاحة له ولو لا حتى فالأحلام، أما بخصوص كلامك الأخير فأسمح لي أقولك أني وعدت بابا بعد ما انفصلت عن أمجد أني مستحيل أكرر غلطي وأخون ثقته بيا مهما كان، فلو في أي حاجة عايز تتكلم فيها معايا فأنت ممكن تتصل ببابا وتطلب منه ميعاد وتيجي البيت عندنا تقول كل اللي أنت عايزه بوجوده، وأهو بالمرة تشرب القهوة اللي كنت عايز تشربها من زمان تمام يا بشمهندس! تجاوزته منار وولجت إلى مقر شركته وتابعها بعينه وهو يشعر بالحيرة لإجابتها ولِثوان أحس سامر بالتشتت لِيعي فجأة معنى إجابتها فقفز بسعادة وأسرع بخطواته خلفها لِيدركها قبل أن تلج مكتبها فالتفتت نحوه وعقدت ساعديها أمامها ورفعت حاجبها فابتسم ببلاهة قائلًا: - هو بجد اللي أنا فهمته من كلامك يا منار؟ ابتسمت بحرج وهزت رأسها بيأس وأردفت: - عيب على ذكائك يا بشمهندس لما تسأل سؤال ممكن يخليني أغير رأيي فيك. أشار بيده بالنفي وأردف بلهفة: - لا فعرضك متغيريش رأيك أنا ما صدقت، عمومًا أنا هروح أتصل بعمي شُهدي علشان أزوره وأتكلم فحضوره وأقول قصاده كل اللي فقلبي وأوضح له حقيقة مشاعري ناحية بنته اللي غلبتني معاها وأطلب منه أني أقولها بحبـ... صرخت بحرج وهربت من أمامه فتلفت سامر حوله بحرج لِيدرك أن موظفيه شهدوا اعترافه فابتسم قائلًا: - أدعو لي بقى علشان لو اتجوزتها بسرعة هَصرف مكافأة شهر بحاله. ضجت أروقة الشركة بالدعاء، بينما جلست منار بقلب يخفق طربًا تقص على والدها ما حدث معها لِيصارحه بقوله: - يا بنتي سامر طالب إيدك مني له أكتر من سنة ومستني موافقتك، عمومًا متتأخريش علشان تجهزي نفسك يا عروسة. وفي مساء اليوم نفسه وبعد سماعهم أذان صلاة المغرب خشعت الأصوات بتلاوة الفاتحة بأكف مضمومة وقلوب متضرعة تبتهل إلى الله بدعائها، وعيون دامعة لا تصدق أن جراح القلب طابت واندملت وذهبت ندوبه دون أثر، وتسللت النظرات لِتتلاقى الأعين بحياء تتهامس بالحب فاقشعر بدنها وابتسمت على استحياء وخفضت بصرها وبداخلها يقين بأنها عثرت على متممها أخيرًا. كلمة أخيرة.. اتقِ الله فَلن يكون بينك وبينه حجاب يوم التلاقي وَستكون وحدك بين يده مغطى بالمعاصي فَـبِما ستُجيب وأنا شكوتك إليه بقلبٍ باكِ؟ يوم انتهكت نفسي بِسفورٍ واستبحت بِمجون مشاعري وَتلاعبت بالحب كَشيطان هوى لِتنال مني وَاستطاب قلبك ألمي ودمع عيني لِذا استجرت بالذي بيده أمرك وأمري بِيقين أن غدًا سأسترد منك حقي تمت منى أحمد حافظ

مقالات ذات صلة

من أغرب القصص التي عرفها الوسط الفني عن الفنانة لطيفة نظمي

مظهر خطيبتي

وعد_جواز

وفـ..ـاة إبراهيم شيكا لاعب الزمالك السابق بعد صـ..ـراع مع المر.ض

حر؟؟؟ب الصعايدة نور الشامي

زوج منع زوجته

اترك تعليقاً إلغاء الرد