اسكريبت المتاهة بقلمي فاطيما يوسف
#بسم_الله_الرحمن_الرحيم
#لا_إله_إلا_أنت_سبحانك_إني_كنت_من_الظالمين
#اسكريبت
#المتاهة
#بقلمي_فاطيما_يوسف
فاقت احلام من البنج بتبص حواليها لقيت نفسها في مكان زي المستشفى بتبص بتشوش للمريضه اللي قدامها وبتقول لها بتوهان :
_انا فين وايه اللي حصل لي وايه اللي جابني هنا انا مش فاكره حاجه خالص .
ابتسمت لها الممرضه وقالت لها :
_حمد لله على سلامتك يا مدام ما تقلقيش انتي حصل لك حادثه بسيطه والحمد لله الدكاتره لحقوكي وفي غيبوبه بقالك أربع أيام وبفضل الله ربنا نجاكي .
احلام كانت تايهه مش فاكره اي حاجه وقالت لها بتساؤل مريب :
_ايه ده هو انا مدام انا مش فاكره حاجه خالص ولا فاكره حتى اسمي ولا انا ابقى مين ولا بنت مين !
وكملت وهي بتعيط والدموع ملت وشها :
_من فضلك قولي لي انا جيت هنا ازاي او مين اللي جابني .
ردت عليها الممرضه وهي بتهديها :
_من فضلك اهدي يا مدام احلام فقدانك للذاكره من اثر العمليه ومن اثر الحادثه وما تقلقيش مش هيطول كثير احمدي ربنا انك قمتي بالسلامه وربنا نجاكي من الحادثه الشنيعه اللي انتي عملتيها .
احلام حست بصداع رهيب من كتر العياط ومن الصدمه اللي اخذتها فحطيت ايديها على راسها وقالت بوجع :
_اه دماغي بتوجعني حاسه بصداع هيفرتكها الحقوني .
الممرضه حاولت تهديها اكتر وقالت لها وهي خارجه :
_معلش ده من اثر البنج وكمان إنتي عماله تعيطي انا هروح اندهلك بالدكتور حالا .
وخرجت الممرضه تنده للدكتور وكان اللي جايبها بعربيته واقف بره فجري على الممرضه وسالها :
_لو سمحتي انتي بتجري كده ليه هي احلام جرى لها حاجه طمنيني عليها حالا .
ردت عليه الممرضه بسرعه :
_للاسف المدام جالها فقدان ذاكره مش فاكره اي حاجه خالص وحاليا هي عندها صداع شديد ومنهاره وعماله تعيط هروح اندهلها للدكتور يجي يشوفها .
جري ماجد على اوضتها ودخل و الابتسامه مالية وشه وراح عليها وهو بيحضنها وقال لها بفرحه شديده :
_ حمد لله على سلامتك يا حبيبتي نورتي الدنيا ربنا يكمل شفاك على خير يا رب وحشتيني قوي قوي قوي .
استغربت احلام منه جدا لأنها ما تعرفوش وحاولت تبعد بجسمها عنه وقالت له بتوهان :
_انت مين وازاي تدخل تحضني كده وانا ما اعرفكش؟
حس ماجد بالوجع علشانها ولكن ابتسم ورد عليها :
_معقوله مش عارفه ماجد جوزك حبيبك وحب عمرك ،
انا ماجد جوزك يا حبيبتي متجوزين بقى لنا خمس سنين .
ضيقت حواجبها واستغربت من كلامه وردت عليه :
_متجوزين بقى لنا خمس سنين معقوله وانا مش فاكره !
طب انا ايه اللي حصل لي وخلاني عملت الحادثه وجيت المستشفى ؟
مسك ايديها وحضنهم بين ايديه وقال لها علشان يطمنها :
_ما تتعبيش روحك يا حبيبتي انتي يومين وهتفتكري وهتبقي كويسه اهم حاجه انك رجعت لنا بالسلامه وربنا ينجيكي ما تتصوريش انت وحشاني قد ايه يا لومة .
وفضلوا يتكلموا مع بعض الاثنين يعرفها عن حياتهم اكثر وهي مستمعه لحد ما حس انها تعبت والدكتور جالها تطمن عليها واديها حقنه مهدئه علشان ما تتعبش نفسها اكتر وعلشان الصداع .
__________________________
ماشي خالد بيلف حوالين نفسه بقاله يومين بيحاول يوصل لمراته ومش عارف يوصل لها وخلاص قلق من جواه وقرر يكلم اهلها ،
فاتصل على والدها الحاج جابر وقال له بقلق :
_ازيك يا حاج صحتك عامله ايه انا بقى لي يومين بتصل على أم مالك ومش عارف اوصل لها انا خايف يكون جرى لها حاجه علشان كده مش بترد عليا ؟
الحاج جابر قلق جدا على بنته وخاصه انها بعيده أوي عنه لانهم من الصعيد ورد عليه وقال له بإستغراب :
_ازاي الكلام اللي انت بتقوله ده انا مكلمها من يومين بالضبط وكانت كويسه وردت عليا وفتحت الفيديو وكلمتني هي ومالك ابنكم انت كده قلقتني جدا .
انصدم خالد من رد ابوها كان مفكر ان هو هيريحوا وفورا قال له بحزن شديد :
_انا بحاول اوصل لها بقى لي يومين لاني بكلمها على طول في اليوم مرتين ثلاثه لكن بقى لي يومين بكلمها ما بتردش عليا وانا كده خلاص قلقت عليها هي ومالك انا فورا هعمل اجازه وهنزل واللي يحصل يحصل انا مش هقدر اصبر اكتر من كده .
ابوها بقى قاعد ولا على حامي ولا على بارد وخلاص الخوف على بنته ركبه ورد عليه وقال له :
_انا كمان هاخد اخوها وهننزل على مصر نشوفها ونطمن عليها ونطمنك ولعل المانع خير يا ابني .
